Երկուշաբթի 5 յունիս 2017-ին, առաւօտուն, Ամենապատիւ Հոգեւոր Տիրոջ առաջնորդութեամբ՝ Զմմառու վանք այցելեցին Լիբանանի մօտ պապական նուիրակ՝ Կապրիէլէ Քաչչիա, Իտալիոյ Եպիսկոպոսաց Ժողովի (CEI) ընդհանուր քարտուղար՝ Արհիապատիւ Հ. Նունցիօ Եպս. Կալանթինօ եւ Հ. Անթօնիօ Մասդանդուօնօ, ինչպէս նաեւ այլ հոգեւորականներ, ընկերակցութեամբ Պէյրութի Հայ կաթողիկէ թեմի օգնական եպիսկոպոս՝ Հ. Գէորգ Ասատուրեանի: Զմմառու Պատրիարքական Կղերի Միաբանութեան Փոխանորդ եւ վանքի Մեծաւոր՝ Հ. Գաբրիէլ թ.ծ.վրդ. Մուրատեան եւ վարչական ու վանաբնակ հայրերը ընդունեցին յարգոյ հիւրերը վանքի դահլիճը: Այնուհետեւ հիւրերը յաջորդաբար այցելեցին վանքին զանազան բաժինները՝ Մայր Տաճարը, Ցաւագին Տիրամօր մատուռ, մատենադարանը, թանգարանը եւ գինեմառանը: Այցելութեան աւարտին՝ յարգարժան հիւրերը մասնակցեցան միաբանական ագապին, որմէ ետք խորապէս տպաւորուած իրենց վերապահուած ջերմ ու սիրալիր ընդունելութենէն՝ Զմմառու դարաւոր վանքէն բաժնուեցան, իրենց հետ տանելով անթառամ յիշատակներ:
