ԱՄԵՆԱՊԱՏԻՒ ՀՈԳԵՒՈՐ ՏԷՐԸ ՎԵՐԱԴԱՐՁԱՒ ԻՐ ՆՍՏԱՎԱՅՐԸ

Ամենապատիւ եւ Գերերջանիկ Գրիգոր Պետրոս Ի. Տանն Կիլիկիոյ կաթողիկէ Հայոց Կաթողիկոս Պատրիարքը Հռոմէն Պէյրութ, իր նստավայրը՝ Հայ Կաթողիկէ Պատրիարքարան վերադարձաւ երէկ, 10 յուլիսի յետմիջօրէին։ Ան  մեկնած էր Հռոմ Սրբազան Քահանայապետին հրաւէրով,  7 յուլիսին մասնակցելու համար Միջին  Արեւելքի խաղաղութեան դիտաւորութեան աղօթքի եւ  խորհրդածութեան յատուկ օրուան, որ տեղի ունեցաւ Պարիի մէջ եւ որուն մասնակցեցան  Միջին Արեւելքի 17 կաթողիկէ եւ ուղղափառ բոլոր եկեղեցիներու հովուապետերը կամ ասոնց ներկայացուցիչները, որոնց շարքին նաեւ Մեծի Տանն Կիլիկիոյ Արամ Ա. Կաթողիկոսը եւ Ամենայն Հայոց Գարեգին Բ. Կաթողիկոսին ներկայացուցիչը՝ Իրլանտայի եւ Մեծն Բրիտանիոյ հայոց առաջնորդ Հովակիմ Սրբազան։