Հայաստանի Հանրապետութեան նախագահ Արմէն Սարգսեան շնորհաւորական ուղերձ յղած է Նորին Սրբութիւն Ֆրանչիսկոս Պապին՝ Քահանայապետ ընտրութեան 7-րդ տարեդարձին առթիւ։ Այս մասին «Արմենպրես»ին տեղեկացուցած է ՀՀ նախագահի աշխատակազմի հասարակայնութեան հետ կապերու վարչութիւնը:
Արմէն Սարգսեան եղած է Վատիկանի մօտ Հայաստանի Հանրապետութեան առաջին արտակարգ և լիազօր դեսպանը: Իսկ 1997-ին Նորին Սրբութիւն Յովհաննէս Պօղոս Երկրորդ Պապին կողմէ արժանացած է Սուրբ Գրիգոր Մեծի շքանշանի Մեծ Խաչ աստիճանին: Անոր գործուն մասնակցութեամբ 1999-ին Սիքստինեան Տաճարին մէջ, ի նշանաւորում պատմական ու մշակութային հարուստ անցեալի, երջանկայիշատակ Նորին Սրբութիւն Յովհաննէս Պօղոս Երկրորդի և երջանկայիշատակ Նորին Սրբութիւն Ամենայն Հայոց Կաթողիկոս Գարեգին Առաջինի ներկայութեամբ բացուած է «Հայաստան-Հռոմ» ցուցահանդէսը:
Իր ուղերձին մէջ յիշատակելով այդ մասին ՝ նախագահ Արմէն Սարգսեան նաև նշած է, որ հայերու կապերը և առնչութիւնները Վատիկանի հետ ունին հազարամեակներու պատմութիւն, իսկ ներկայիս Հայաստան-Վատիկան միջ-պետական յարաբերութիւնները կը շարունակեն ներդաշնակ զարգանալ: Նախագահ Սարգսեան իր երախտագիտութիւնը յայտնած է աշխարհի մէջ խաղաղութեան, արդարութեան և մարդկային արժանապատուութեան հաստատման, Հայաստանի Հանրապետութիւն-Սուրբ Աթոռ միջ-պետական յարաբերութիւններու հզօրացման ուղղութեամբ Նորին Սրբութեան անվերապահ դիրքորոշման համար:
«Առանձնակի ջերմութեամբ կը յիշեմ 2016 թուականի Յունիսին Հայաստան կատարած Ձեր այցը և մեր անձնական հանդիպումը,– Նորին Սրբութեան յղած շնորհաւորագրին մէջ ըսած է Հայաստանի նախագահը:– Լիայոյս եմ, որ մօտ ապագային կրկին կը հանդիպինք»:
Նախագահ Արմէն Սարգսեան Նորին Սրբութեան մաղթած է քաջառողջութիւն, յաջողութիւն և կորով` երկար տարիներ առաջնորդելու Տիեզերական Եկեղեցւոյ նուիրական առաքելութիւնը:
