Ուրբաթ, 2 Օգոստոս 2013 - 2014-ի 47րդ «Խաղաղութեան Համաշխարհային Օր»ուայ Նիւթը` «Եղբայրութիւնը, խաղաղութեան հիմք ու ճանապարհ»

Վատիկան

Ֆրանչիսկոս Պապը 2014-ի համար, իր քահանայապետութեան առաջին Համաշխարհային Օրուայ պատգամի որպէս նիւթ ընտրած է ''Եղբայրութիւնը որպէս խաղաղութեան հիմք ու ճանապարհ''։

«Խաղաղութեան Համաշխարհային Օր»ը հաստատուած է Պօղոս Զ.ի կողմէ եւ կը նշուի ամէն տարի յունուար մէկին։ Համաշխարհային Օրուան պատգամը կ'ուղղուի բոլոր տեղական եկեղեցիներուն եւ ողջ աշխարհի դիւանագիտական մարմնին, վերյիշելու համար խաղաղութեան էական արժէքը եւ խաղաղութիւնը իրականացնելու նպատակով անխոնջ աշխատանքի հարկաւորութիւնը։

Ֆրանչիսկոս Պապը՝ իր քահանայապետութեան առաջին «Խաղաղութեան Համաշխարհային Օր»ուան նիւթ ընտրեց «Եղբայրութիւն»ը: Ան իր Քահանայապետ ընտրուելուն առաջին օրէն իսկ յաճախ անդրադարձած է «հանդիպումի մշակոյթը» զարգացնելու մասին, որպէս խթան աւելի արդար ու խաղաղ աշխարհի մը կառուցման։

Եղբայրութիւնը առանձնայատկութիւն մըն է որ ամէն այր ու կին իր մէջ ունի որպէս մարդ էակ` միեւնոյն Հօր զաւակ։ Ազգերու ընտանիքին սպառնացող բազմաթիւ աղէտներու դիմաց - աղքատութիւն, անօթութիւն, հակամարտութիւն, գաղթականութիւն, ապականութիւն, անհաւասարութիւն, անարդարութիւն, ոճրագործութիւն, ծայրայեղութիւն, եւայլն - եղբայրութիւնը կր մնայ որպէս խաղաղութեան հիմք ու ճանապարհ։

Բարեկեցութեան մշակոյթը կորսնցնել տուած է պատասխանատուութեան եւ եղբայրական յարաբերութեան իմաստը։ Միւսները փոխանակ մեր նմանները համարելու, զանոնք կը նկատենք որպէս հակառակորդ կամ թշնամի։ Հազուադէպ չէ նաեւ որ աղքատները նկատուին որպէս ընկերութեան համար ''բեռ'' եւ զարգացումի արգելք։ Անոնք չեն նկատուիր որպէս ''եղբայրներ'' կանչուած կիսելու արարչութեան պարգեւները եւ մշակոյթի ու զարգացումի բարիքները։

Իր քահանայապետութեան սկզբնական շրջանի պատգամին մէջ, Ֆրանչիսկոս Պապը իր նախորդներուն նման բոլորին կ'առաջարկէ եղբայրութեան ճանապարհը` աշխարհին տալու համար աւելի մարդկային դիմագիծ։ Ինչպէս կ'ըսէ Ան, «աշխարհականացումի եւ անտարբերութեան տեղ թող ծաւալի եղբայրութեան աշխարհականացումը»։


http://hy.radiovaticana.va/news/2013/08/01/2014-%D5%AB_%D5%AD%D5%A1%D5%B2%D5%A1%D5%B2%D5%B8%D6%82%D5%A9%D5%A5%D5%A1%D5%B6_47%D6%80%D5%A4_%D5%B0%D5%A1%D5%B4%D5%A1%D5%B7%D5%AD%D5%A1%D6%80%D5%B0%D5%A1%D5%B5%D5%AB%D5%B6_%D6%85%D6%80%D5%B8%D6%82%D5%A1%D5%B5_%D5%B6%D5%AB%D6%82%D5%A9%D5%A8%60_%D5%A5%D5%B2%D5%A2%D5%A1%D5%B5%D6%80%D5%B8%D6%82%D5%A9%D5%AB%D6%82%D5%B6%D5%A8,/arm-715992

Առօրեայ Աւետարանը
Այբ Էջ | Բովանդակութիւն | Հասցէարան | Օգտակար Կապեր | Նամականի
Ներքին Պրպտում՝  Armenian Keyboard
Կարդացէ՛ք այս էջը հետեւեալ լեզուներով.-    
Վերարտադրութեան ամէն իրաւունք վերապահուած է Հայ Կաթողիկէ Եկեղեցւոյ