Շաբաթ, 24 Մարտ 2007 - Զալքայի Հ.Կ.Մ. Պատանեկանի Հնգամեակի Հանդէս

Պէյրութ,Լիբանան

Բարձր հովանաւորութեամբ Ամենապատիւ Տէր Ներսէս Պետրոս ԺԹ. Կաթողիկոս Պատրիարքի Տանն Կիլիկիոյ Կաթողիկէ Հայոց, Կիրակի 25 Մարտ 2007-ին, երեկոյեան ժամը 8:00ին, Զալքայի ‏‏Հայ կաթողիկէ Ս. Խաչ եկեղեցւոյ Պետողլեան թատերասրահին մէջ տեղի ունեցաւ Զալքայի Հ.Կ.Մ. Պատանեկան Միութեան հնգամեակին նուիրուած գեղարուեստական հանդէսը:

Երեկոն յագեցած էր գեղարուեստական ճոխ յայտագրով:Պատանիները  հոգեւոր թատերախաղով մը ներկայացուցին Ս.Գրիգոր Լուսաւորչի կեանքէն առնուած դրուագ մը, ինչպէս նաեւ հայ ֆետայիի մը մասին պատմող ազգային ոգիով լի ներկայացում  մը, երաժշտախաղ մը նկարագրելով Լիբանանի երիտասարդութեան ներկայ վիճակը եւ երգիծախաղ մը: Պատանիները բեմը հարստացուցին նաեւ  հայկական աւանդական եւ արդիական պարերով ներկաներուն մօտ ստեղծելով խանդավառ մթնոլորտ մը:

Յայտագրի աւարտին միութեան Հոգեւոր Վարիչ՝ Հայր Անդրանիկ Ծ.Վ. Կռանեանը եւ Ամենապատիւ Հոգեւոր Տէրը յուշակոթողով մը պարգեւատրեցին այն հաստատութիւններն ու անձերը որոնք 5 տարիներու ընթացքին նիւթապէս եւ բարոյապէս օժանդակած էին միութեան բարգաւաճման:   ‎

Հանդիսութեան փակումը կատարեց Ամենապատիւ Հո•եիոր Տէրը.Անոր խօսքը կը կցենք ամբողջութեամբ.-

  Յոյժ Սիրելիներս,

«Հինգ տարիներու Անշեղ ճամբով»:
 5 տարի» փոքր իրականութիւն մըն է ժողովրդապետութեան կեանքին մէջ, բայց 5 տարի կարեւոր ժամանակ է, որովհետեւ բաւարար է լաւ հիմեր հաստատելու Հ.Կ.Մ. Պատանեկան Միութեան համար, եւ արդիւնքը զայն կը փաստէ: Եւ քանի «անշեղ ճամբով» կ’ընթանայ, յոյս կու տայ որ երկար պիտի ապրի: 5 տարի փոքր յոբելեան մըն է, որ պիտի դառնայ օր մը մեծ յոբելեան, 50 տարեկան: Այս է մաղթանքս, այս է պատասխանատուներուն եւ նուիրողներուն յոյսը, այս է գրաւը որ մեզի կը ներկայացնեն այսօր պատանիներուն յարաճուն աճող թիւը հիմնադրութեան օրէն ի վեր:

Գերյ. Հ. Անդրանիկ Ծ.Վ. Կռանեան՝ ուր որ եղած է, բան մը հիմնած է: Երգչախումբ, Պատանեկան Միութիւն, Գրական գործ: Անսակարկ կերպով աշխատած է տարածելու եւ հաստատելու համար, մանաւանդ Պատանիներուն մօտ, հոգեւոր կեանք եւ հայեցի կրթութիւն. քանի մենք 2 ինքնութիւն ունինք՝ մենք կաթողիկէ քրիստոնեայ ենք եւ հայ քրիստոնեայ: Իր գլխաւոր մտահոգութիւնը եղաւ ապագային համար լաւ սերմ ցանել բարի հողին մէջ: Իր մտահոգութիւնը եղաւ հայ պատանիներ կազմաւորել իբր ճշմարիտ հայ եւ իբր ճշմարիտ քրիստոնեայ:

Այս նուիրական գործին մէջ իրեն աջակից դարձան հոգեւորականներ՝ փոխ-ժողովրդապետներ յանձին Հ. Գաբրիէլ Վ. Մուրատեանի եւ Հ. Ղեւոնդ Վ. Քէնտիրճեանի ինչպէս նաեւ աշխարհականներ՝ պատասխանատու երիտասարդ երիտասարդուհիներ, որ շատ անգամ ինք պատրաստած է եւ կազմաւորած: Եւ լաւ ըրաւ, քանի մէկ ձեռք առանձին չի ծափեր: Հ. Կռանեան կրցաւ խրախուսել նաեւ բարեսիրտ նուիրատուներ, որոնք   նիւթապէս օգնեցին իրեն եւ դարձան անհրաժեշտ օժանդակիցներ այս աստուածահաճոյ գործին: Ջերմապէս կը շնորհաւորեմ այսօրուայ պարգեւատրեալները: Աստուած ձեզի վարձահատոյց ըլլայ:

Թող Աստուած Հ. Կռանեանի նմանները եւ աջակիցներուն նմաններ շատցնէ ձեր ժողովրդապետութեան մէջ, մեր համայնքին համար, լիբանանահայութեան համար:

Այս երեկոյ հաճելի մշակութային երեկոյթ մը վայելեցինք ընտանեկան մթնոլորտին մէջ: Կ’ուզեմ իմ հայրական գնահատանքս եւ ջերմ քաջալերանքս արտայայտել բոլոր մասնակցողներուն, մանաւանդ հոգեւոր եւ ազգային բնոյթով թատերախաղերը, որոնք կ’անդրադառնան մեր քրիստոնեայ եւ ազգային ինքնութիւններուն մասին, Հայկական պարի պարող պարուհիներուն ու պարուսոյց օրիորդին, եւ բոլոր անոնց որոնք աշխատեցան ու հոգնեցան յաջողցնելու համար այս երեկոյ:

Հ.Կ.Մ. Զալքայի Պատանիներուն կ’ըսեմ՝ ապրիք, շատ ապրիք եւ բազմանաք:

 

 

 

 

 


Առօրեայ Աւետարանը
Այբ Էջ | Բովանդակութիւն | Հասցէարան | Օգտակար Կապեր | Նամականի
Ներքին Պրպտում՝  Armenian Keyboard
Կարդացէ՛ք այս էջը հետեւեալ լեզուներով.-    
Վերարտադրութեան ամէն իրաւունք վերապահուած է Հայ Կաթողիկէ Եկեղեցւոյ