Շաբաթ, 18 Դեկտեմբեր 2010 - Ծննդեան տօնին համերգ Հռոմի սուրբ Նիկողայոս եկեղեցւոյ մէջ

 

Հռոմ

 

Հովանաւորութեամբ՝ Հռոմ մայրաքաղաքի մշակութային եւ հաղորդակցութեանց քաղաքապետական յանձնաժողովին, եւ կազմակերպութեամբ «Spazio Teatro 80» անուան՝՝ մշակութային ընկերակցութեան, ինչպէս նաեւ՝  համագործակցութեամբ՝ Հռոմի հայ համայնքի խորհուրդին, կիրակի 12 դեկտեմբերին երեկոյեան՝ սուրբ Նիկողայոսի անուան հայոց եկեղեցւոյ մէջ տեղի ունեցաւ համերգ մը «Միացած՝ կրօնական տարբերութիւններու յարգանքով» խորագրով, ի պատրաստութիւն Յիսուսի Ծննդեան տօնին։  

Համերգին սկիզբը՝ օրուան հանդիսավարը լրագրող՝ Մատտալէնա Գակկավալլօ-ն ողջունեց  ներկաները, եւ յատուկէն  շնորհակալութիւն յայտնեց Հռոմի ք. Լեւոնեան հայ վարժարանի մեծաւորին՝ գերյ. հայր Գէորգ ծ.վ. Նորատունկեանին, որ ընդունեց որ այս համերգը տեղի ունենայ սուրբ Նիկողայոսի անուան Հայոց եկեղեցւոյ մէջ։

Եկեղեցին լեցուն էր հայ եւ իտալացի արուեստասէրներով։ Ներկայ էին նաեւ մամուլի հաղորդամիջոցները, յատկապէս՝ Telepace Armenia Խաղաղութեան ձայնի հեռուստատեսիլը ։

 

Համերգին Հռոմի բազմաձայն երգչախումբը կազմուած՝ 8 տարբեր ազգութիւններու պատկանող երախաներէ, ղեկավարութեամբ՝ Գարլօ Մոնթիչէլլի Քուճճոյի, հրամցուց  «Ծննդեան երգերու ծաղկեփունջ մը», ստեղծելով տօնական մթնոլորտ մը։ Յայտագիրը ընդգրկեց երգեցողութիւններ եւ ասմունք, արտասանելով Եղիշէ Չարենցի՝ «Ես իմ անուշ Հայաստանի» բանաստեղծութիւնը, իտալերէնի թարգմանուած՝ հայերու մեծ բարեկամ  Մարիօ Վերտոնէի կողմէ:

Ապա երգչախումբէն՝ Սարա Բասթորէն երգեց նաեւ հայ մարտիրոսներու նուիրուած՝  «Լռեց ամպերը ելան ծածկեցին երկինք»ը, Ave Maria, եւ Panis Angelicus-ը։

Խօսք առաւ  ապա Diana Stefani  «Alleanza per le Arti- Արուեստի ի նպաստ դաշնակցութեան» նախագահը, որ  նշեց սոյն կազմակերպութեան նպատակը, որ է  արժեւորել արուեստը եւ մշակոյթը իր բոլոր  տեսակներով, ան ըսաւ նաեւ թէ սոյն կազմակերպութիւնը  զօրակցութեան ու բարեսիրական գործունէութեանց  միջոցառումներով եւս հանդէս կու գայ։

 

Այս առթիւ տիկին Սթէֆանին՝ «Alleanza per le Arti» ի կողմէ՝ վկայագիրներ յանձնեց  Հայր Սթէֆանօ տէ ֆիորէսին, հայր Էրնեսթօ Բիաչէնթինիին եւ հայր Գէորգ Նորատունկեանին, «Խաղաղութեան ի նպաստ» իրենց տարած գործունէութիւններուն համար։ Երեք պարգեւատրուող վարդապետները իրենց շնորհակալութեան արտայայտութիւններէն ետք յայտնեցին իրենց յանձնառումը՝   շարունակելու գործել միշտ խաղաղութեան ի խնդիր։

Ապա ք. Լեւոնեան հայ դպրեվանքի երգչախումբը ղեկավարութեամբ՝ Պետրոս Աստուծատուրեան Աթթալլայի լսելի ըրաւ Ծննդեան շարականներ, Մեծացուսցէն, Ննջեայ որդեակ-տիրամօր օրօրը, եւ Խորհուրդ մեծ-ը, իսկ  Վատիկանի Սանթաննայի անուան երգչախումբը ղեկավարութեամբ՝ հայր Կայէթանօ Չիվիթիլլոյի լսելի ըրաւ ի մէջ այլոց  Նօէլ, Ավէ Մարիա, Նիննա Նաննա եւ Վերտիի՝ La Vergine degli Angeli-ն։

Ներկայ էր նաեւ «Los Ninios del mar» հիմնարկին պատասխանատուն, որ խօսեցաւ սոյն հիմնարկի գործունէութեան մասին որ է՝ պաշտպանել բռնաբարութեան ենթարկուած մանուկները, զանոնք ազատելով փողոցի կեանքէն եւ տրամադրելով յարմար դաստիարակութիւն։

 

Համերգի աւարտին, հուսկ բանքը արտասանեց  ք. Լեւոնեան հայ վարժարանի մեծաւոր՝ հայր Գէորգ ծ.վ. Նորատունկեան, որ քաջալերական խօսք մը ուղղեց  համերգը պատրաստողներուն, մասնակցողներուն եւ մեծաթիւ ներկաներուն, շնորհակալութիւն յայտնելով Telepace Armenia Խաղաղութեան ձայնի հեռուստատեսիլին, որ ներկայ էր հեռասփռելու այս երեկոյթը, եւ մաղթելով բոլորին ուրախ եւ խաղաղ տօնական օրեր։

 


Առօրեայ Աւետարանը
Այբ Էջ | Բովանդակութիւն | Հասցէարան | Օգտակար Կապեր | Նամականի
Ներքին Պրպտում՝  Armenian Keyboard
Կարդացէ՛ք այս էջը հետեւեալ լեզուներով.-    
Վերարտադրութեան ամէն իրաւունք վերապահուած է Հայ Կաթողիկէ Եկեղեցւոյ