Շաբաթ, 27 Նոյեմբեր 2010 - Քահանայական ձեռնադրութիւն սարկաւագ՝ Էլիաս Եղիշէ Ճէնճիի


Հալէպ

Շաբաթ
20 նոյեմբեր 2010, երեկոյեան ժամը 6-ին, Հալէպի հայ կաթողիկէ Մայր Գթութեանց աթոռանիստ եկեղեցւոյ մէջ, տեղի ունեցաւ քահանայական ձեռնադրութիւնը՝ Բերիոյ թեմական սարկաւագ Էլիաս-Եղիշէ Ճէնճիի, ձեռամբ Բերիոյ հայ կաթողիկէ թեմին առաջնորդ եւ Բարձ Ճեզիրէի թեմին առաքելական կառավարիչ՝ արհիապատիւ Պետրոս արք. Միրիաթեանի:

Սրբազան արարողութեան դասին մէջ ներկայ էին' քոյր Եկեղեցւոյ եպիսկոպոսները, ձեռնադրուողին բարեկամ- վարդապետները, Բերիոյ  թեմի վարդապետները, Հալէպի Զմմառու միաբանութեան սուրբ Միքայէլ Հրեշտակապետի դպրեվանքին մեծաւոր հայր Պերճ վրդ. Սապէհը, Հասաքէի սուրբ Ընտանեաց եկեղեցւոյ ժողովրդապետ հայր Գառնիկ վրդ. Յովսէփեանը, առաքինազարդ հայ քոյրերը, ձեռնադրուողին պարագաները ու բարեկամները եւ հոծ բազմութիւն մը հայ հաւատացեալ ժողովուրդէն:

Օգնական ձեռնադրիչ եպիսկոպոսին առընթերակայներն էին' գերյարգելի Գէորգ ծ. վրդ. Նորատունկեանը, Մեծաւոր Ք. Լեւոնեան հայ վարժարանի, գերյարգելի Յովսէփ ծ. վրդ. Պէզէզեանը, ժողովրդապետ սուրբ Երրորդութեան- Զուարթնոց եկեղեցւոյ:

Աստուծոյ Խօսքին ընթերցումէն ետք, ձեռնադրիչ սրբազան հայրը աւուր պատշաճի քարոզը արտասանեց ուղղուելով տէր Էլիաս-Եղիշէ սարկաւագին ըսաւ. « Սիրեցեալ որդիակ իմ Եղիշէ, ի մանկութէնէդ ի վեր մինչեւ ցայսօր ճանցած եմ քեզ եւ քո բարեպաշտ ու հաւատացեալ ծնողածդ, զգուշութեամբ հետեուած եմ քո կեանքի հիմնական հանգրուաններուն մինչես այս ճակատագրական րոպէի, ի խորոց սրտէ, կը շնորհաւորեմ քեզ եւ քո եկեղեցասէր ծնողքդ որ քեզի նեցուկ կանգնեցան ու քաջալերեցին հասնելու համար այս վսեմ ու վեհագոյն աստիճանին որ է սուրբ քահանայութիւնը. Եղիր մտերիմ բարեկամը Քրիստոսի ու ապաստանը քու բոլոր դժուարութիւներուդ զորս պիտի հանդիպիս քու քահանայական կեանքիդ ընթացքին եւ մի մոռնար թէ այսօրուն քահանան պէտք է ըլլայ Աստուծոյ մարդ, իմաստութեան մարդ եւ շնորհքի մարդ նման Քրիստոսի բարձրագոյն օրինակին».

Ապա Գերյարգելի Գէորգ Ծ. Վրդ. Շահպազեանը կարդաց ամենապատիւ եւ տէր Ներսէս Պետրոս ԺԹ. կաթողիկոս պատրիարք Տանն Կիլիկիոյ կաթողիկէ հայոցի մաղթանքի գիրը, ուղղուելով նորօծ վարդապետին ըսաւ. « կը մաղթեմ որ դառնաս հովիւ մը, նման բարի Հովիւին Յիսուսի: Քաջ գիտցիր որ մտերմութիւնը մտերմութեամբ կը փոխանակուի, բարեկամութիւնը բարեկամութեամբ եւ սէրը սիրով».

Սուրբ պատարագէն ետք, սրբազան կղերը եւ նորօծ վարդապետին պարագաները ուղղուեցան առաջնորդարանին թահլիճը ուր տեղի ունեցան շնորհաւորութիւնները:

Կիրակի 21 նոյեմբեր 2010, Ընծայման սրբոյ Կուսին Մարիամու Աստուածածնայ տօնին, առաւօտեան ժամը 10-ին, սուրբ Երրորդութեան- Զուարթնոց եկեղեցւոյ մէջ, նորօծ վարդապետը մատոյց իր անդրանիկ սուրբ պատարագը:


Կենսագրական
գիծերը Հ. Եղիշէ Վրդ. Ճէնճիի

Հայր Եղիշէ վրդ. Ճէնճի, ծնած է 19 նոյեմբեր 1985-ին, Հալէպ-Սուրիա: Իր նախնական կրթութիւնը ստացած է ծուխական Իման-սուրբ Գրիգոր Լուսաւորիչ վարժարանին մէջ:
1996-ին կընդունուի Հալէպի Զմմառու միաբանութեան սուրբ Միքայէլ Հրեշտակապետի դպրեվանքը, ուր վեց տարուայ ընթացքին կը շարունակէ բարձրագոյն ուսումը աւարտելով սուրիական բաքալորիան:
Ապա կը փոխադրուի Լիբանանի Տիրամայր Զմմառու մայրավանքը, յաճախելով Պօղօսեան հայրերու համալսարանը հետեւելով աստուածաբանական եւ իմաստասիրական դասընթացքներուն:
Կը մեկնի Հռոմի Ք. Լեւոնեան հայ վարժարանը, ուր կը յաճախէ քահանայապետական Գրիգորեան Յիսուսեան համալսարանը մասնագիտանալով աստուածաբանական դաւանաբանական նիւթին մէջ:
Այս պատրաստթողական տարիներուն ընթացքին խորապէս կը ծարգացնէ երաժշտական բարձրագոյն ուսմունքները, ուր Լիբանանին մէջ կուսանի երաժշտական երգահանը եւ երգչախումբի ղեկավարութիւնը:
7 մարտ 2010-ին, Հռոմի սուրբ Նիկողայոս եկեղեցւոյ մէջ, ձեռամբ արհիապատիւ Պետրոս արք. Միրիաթեանի, կը ձեռնադրուի սարկաւագ, այսպէս թեմական դառնալով Բերիոյ կղերին:
20 Նոյեմբեր 2010-ին, ձեռամբ արհիապատիւ Պետրոս արք. Միրիաթեանի, Հալէպի հայ կաթողիկէ Մայր Գթութեանց աթոռանիստ եկեղեցւոյ մէջ, կը ձեռնադրուի կուսակրօն քահանայ ստանցնելով սուրբ Երրորդութեան- Զուարթնոց եկեղեցւոյ փոխ-ժողովրդապետի պաշտօնը:

 


Առօրեայ Աւետարանը
Այբ Էջ | Բովանդակութիւն | Հասցէարան | Օգտակար Կապեր | Նամականի
Ներքին Պրպտում՝  Armenian Keyboard
Կարդացէ՛ք այս էջը հետեւեալ լեզուներով.-    
Վերարտադրութեան ամէն իրաւունք վերապահուած է Հայ Կաթողիկէ Եկեղեցւոյ