Շաբաթ, 12 Յունիս 2010 - Փակում Քահանայական տարւոյն

 

Հռոմ

Ուրբաթ 11 Յունիս, առաւօտեան ժամը 10ին, սուրբ Պետրոս հրապարակին վրայ Բենեդիկտոս ԺԶ.  Սրբազան Քահանայապետը նախագահեց պատմական համապատարագի մը, որուն մասնակցեցան աւելի քան 15 հազար քահանայ՝ աշխարհի չորս կողմերէ եկած:  Այս համապատարագին, որուն ընթացքին փակումը յայտարարուեցաւ քահանայական տարւոյն,  յատուկ կերպով ժամանած էին Արհի. Տէր Գրիգոր Օգոստինոս Եպս. Գուսան՝ Եգիպտոսի Կաթողիկէ հայերու առաջնորդը, Զմմառու Արծիւեան Միաբանութեան Մեծաւոր Հայր Միքայէլ Թ. Ծ. Վ. Մուրատեան, ինչպէս նաեւ Փարիզի սուրբ Խաչ եկեղեցւոյ հովիւը՝ Հ. Գէորգ Վրդ. Ասատուրեանը: 

Հանդիսաւոր սուրբ Պատարագը սկսաւ ծիսական գեղեցիկ արարողութեամբ, ուր Սրաբազան Քահանայապետը օրհնեալ ջուրով սրսկեց ներկայ քահանայից դասը, ի նշան ապաշխարութեան եւ քահանայական ուխտի նորոգութեան:

Իր քարոզին մէջ,Սրբազան Պապը շեշտը դրաւ քահանային առանձնաշնորհումին, որ կը կայանայ Քրիստոսի անունով մեղքերը արձակելու, հացն ու գինիին վրայ գոհաբանական խօսքեր արտասանելու մէջ, զանոնք կերպարանափոխելով Յիսուսի մարմինին եւ արեան.  «Քահանայութիւնը խորհուրդ մը, ըսաւ Սրբազան Քահանայապետը. Աստուած խեղճ մարդը կ՛օգտագործէ, որպէսզի անոր միջոցաւ կարենայ ներկայ գտնուիլ մարդկանց միջեւ»:  Ապա Քահանայապետը կոչ ուղղեց երիտասարդները մօտեցնելու  Աստուծոյ :
Սրբազան Պապը եզրափակելով իր խօսքը ըսաւ. « Ամէն քրիստոնեայ եւ ամէն քահանայ պարտական է Քրիստոսի միջոցաւ դառնալու աղբիւր մը, որ կեանք կը հաղորդէ ուրիշներուն, կեանքի ջուրը պարգեւելու ծարաւի ու տառապած աշխարհի մը»: Քարոզէն ետք, քահանաները իրենց խոստումները վերանորոգեցին, ինչպէս ամէն տարի կը կատարեն Աւագ Հինգշաբթի օրը Վերջին Ընթրիքի Պատարագին: Նշենք, որ Սրբազան Պապը այս Պատարագին ընթացքին Արսի ժողովրդապետութեան մէջ պահուած սուրբ Յովաննէս Մարի Վիաննէի սկիհը գործածեց:

Պատարագին աւարտին, Սրբազան Քահանայապետը Հռոմի Ողորմութեան Տիրամօր սրբանկարին առջեւ քահանաները  նուիրեց  Ամենասուրբ Կոյս Մարիամի ողորմութեան:
Յիշենք, որ Հինգշաբթի 10 Յունիսի երեկոյեան ժամը 6-ին, Քահանայական տարւոյն փակման առթիւ, սուրբ Պետրոս հրապարակին վրայ տեղի ունեցաւ հսկումի երեկոյ Սրբազան Քահանայապետին հետ:


Առօրեայ Աւետարանը
Այբ Էջ | Բովանդակութիւն | Հասցէարան | Օգտակար Կապեր | Նամականի
Ներքին Պրպտում՝  Armenian Keyboard
Կարդացէ՛ք այս էջը հետեւեալ լեզուներով.-    
Վերարտադրութեան ամէն իրաւունք վերապահուած է Հայ Կաթողիկէ Եկեղեցւոյ