Կիրակի, 3 Յունուար 2010 - Հ.Կ.Մ. Դամասկոսի սուրբ Ծննդեան տօնակատարութիւն

Դամասկոս, Սուրիա

  
Հին$շաբթի 24 Դեկտեմբերի երեկոյեան, Հ.Կ.Մ. Դամասկոսի միութեան աւելի քան 35 պատանիներ ու երիտասարդներ  խումբեր կազմած, այցելեցին համայնքիս ընտանիքներու բնակարանները, «Խորհուրդ մեծ» շարականի երգեցողութեամբ աւետելու ծնունդը Փրկիչին: Միեւնոյն ժամանակ անոնք յանձնեցին փոքր յիշատակի նուէրներ, որոնք պատրաստուած էին ակումբէն ներս:

Կէս գիշերին եկեղեցւոյս մէջ, ձայնաւոր սուրբ Պատարագ մատուցեց Գերապատիւ Հ. Բարսեղ վրդ. Պաղտասարեանը, ներկայութեամբ բազմաթիւ հաւատացեալներու: Պատարագի քառաձայն երգեցողութիւնը կատարեց «Քնար» երգչախումբը: Սուրբ Պատարագին ներկայ  գտնուեցաւ Դամասկոսի Հայոց Թեմի Առաջնորդ Արմաշ Եպս. Նալպանտեանը: Ապա պատարագի ներկայ բոլոր հաւատացեալները հրաւիրուեցան Ռ. Պասմաճեան սրահ, ուր  Հ.Կ.Մ.-ի տիկնանց վարչութիւնը ինչպէս միշտ պատրաստած էր ճոխ հիւրասիրութիւն: Ուրախ մթնոլորտի մէջ ներկաները բարի մաղթանքներ փոխանակելով հաճելի ժամանակ անցուցին ու սիրով մասնակցեցան կազմակերպուած վիճակահանութեան:
 
25 Դեկտեմբերի առաւօտեան հանդիսաւոր պատարագ մատուցեց Արհի. Յովսէփ Եպս. Առնաութեանը, Դամասկոսի Հայ Կաթողիկէ առաջնորդը, որմէ ետք եկեղեցւոյ դահլիճին մէջ ան ընդունեց շնորհաւորութիւնները կառավարական բարձրաստիճան ներկայացուցիչներու  ու համայնքի զաւակներու:

Երեկոյեան, Պասմաճեան սրահին մէջ կայացաւ պատանեկան խորհուրդին կազմակերպած հանդէսը, ներկայութեամբ մեծաթիւ ծնողներու ու փոքրիկներու: Հանդէսը իր ներկայութեամբ պատուեց Գերապայծառ տէրը ու այս առթիւ իր հայրական օրհնութիւնը փոխանցեց բոլորին: Բացման խօսքը ներկայացուց Առնօ Քէշիշեանը ու վարեց յայտագիրը, որու ընդմէջէն ջահակիրներն ու պատանիները, ներկայացուցին սուրբ Ծնունդի նուիրուած երգեր, արտասանութիւններ, ինչպէս նաեւ կատարեցին հայկական թէ եւրոպական պարեր, արժանանալով ներկաներուն գնահատանքին: Ակնյայտ էր պատանեկանի վարիչներու աշխատանքը խնամուած յայտագիր մը պատրաստելու ուղղութեամբ: Ի վերջոյ ժամանեց Կաղանդ Պապան: Ան այս տարի մուտք գործեց սրահ երկնցած պատգարակի մը վրայ,  մի քանի հիւանդապահ պատանիներու օգնութեամբ, քանի ճամբան ծանր հիւանդացած էր: Սրահին մէջ ներկայ խորհուրդի անդամներէն Տոքթ ՐաՖՖի Մարաշլեանը  քննելով Կաղանդ Պապան յայտարարեց թէ վիճակը լաւ է եւ քիչ մը գինի խմելով կ՝առողջանայ: Եւ իրապէս քիչ ետք Կաղանդ Պապան ոտքի ելլելով  խանդավառեց փոքրիկները ու երկար ժամանակ երգեց ու պարեց անոնց հետ: Այստեղ նշենք թէ երկար տարիներէ ի վեր Կաղանդ Պապայի դերը կը կատարէ Հ.Կ.Մ.-ի աշխուժ երիտասարդներէն Գրիգոր Ասատուրեանը ու ամէն տարի իւրօրինակ բեմադրութիւն մը կը յաջողցնէ:

Վերջապէս Կաղանդ Պապան բոլոր ներկայ փոքրիկներուն բաժնեց նուէրներ ու յորդորեց որ ըլլան բարի զաւակներ, միշտ հաճախեն  եկեղեցի եւ ակումբ որպէսզի լաւ դաստիարակուին ու ապագային դառնան փայլուն հայորդիներ:
                                                                                               


Առօրեայ Աւետարանը
Այբ Էջ | Բովանդակութիւն | Հասցէարան | Օգտակար Կապեր | Նամականի
Ներքին Պրպտում՝  Armenian Keyboard
Կարդացէ՛ք այս էջը հետեւեալ լեզուներով.-    
Վերարտադրութեան ամէն իրաւունք վերապահուած է Հայ Կաթողիկէ Եկեղեցւոյ