Շաբաթ, 21 Մարտ 2009 - Ամեն. Հոգեւոր Տէրը Ընդունեց Վեր.Դոկտ. Ռընէ Լեւոնեանը

 
Լիբանան
 

Հինգշաբթի 19 Մարտ 2009-ին, Հայկազեան համալսարանի հրաւէրով Լիբանան ժամանած Հայ Աւետարանական Համաշխարհային Խորհուրդի Հայաստանի ներկայացուցիչ՝ վեր. դոկտ. Ռընէ Ներսէս Լեւոնեան այցելեց  Հայ Կաթողիկէ Պատրիարքարան, ուր ընդունուեցաւ Տանն Կիլիկիոյ Կաթողիկէ Հայոց Ամեն. եւ Գերերջանիկ Տէր Ներսէս Պետրոս ԺԹ. Կաթողիկոս Պատրիարքին կողմէ: Վեր. Լեւոնեանի կ’ընկերակցէր վեր. Մկրտիչ Գարակէօզեան: Հանդիպման ներկայ եղան Պատրիարքական Թեմի Փոխանորդ՝ Արհի. Հայր Վարդան եպս. Աշգարեան, Թեմի Օգնական եպիսկոպոս՝ հայր Յովհաննէս եպս. Թէյրուզեան, Զմմառեան Միաբանութեան Պատրիարքական Փոխանորդ՝ հայր Միքայէլ Թ.Ծ.Վ. Մուրատեան, «Մասիս» ամսաթերեթի ընդհանուր խմբագիր Գերյ. հայր Անդրանիկ Ծ.վրդ. Կռանեան, Ս. Կուսին Աւետման եկեղեցւոյ ժողովրդապետ՝ հայր վարդան վրդ. Գազանճեան եւ «Մասիս»-ի պատասխանատու տնօրէն՝ պրն. Սարգիս Նաճառեան:

 
Շուրջ ժամ մը տեւող այս հանդիպման ընթացքին, վեր. Լեւոնեան խօսեցաւ Հայաստանի մէջ վերջին 15 տարուայ Հայ Աւետարանական եկեղցեւոյ
 
տարբեր կրօնական, ընկերային, բարեգործական եւ մշակութային ծրագիրներուն մասին, շեշտը դնելով Աստուածաբանական Ակադեմիայի վրայ, որ կը պատրաստէ Աւետարանական եկեղեցւոյ հոգեւորականները եւ քարոզիչները: Ան իր մտահոգութիւնները յայտնեց վերջերս Ազգային Ժողովի մէջ արծարծուած խղճի ազատութեան եւ կրօնքներու վերաբերեալ նոր նախագիծի մասին, որ ըստ հիւրին կրնայ ստեղծել դժուարութիւններ եւ անհանդուրժողականութիւն հասարակական կարգերէն ներս, սակայն աւելցնելով թէ միայն երկխօսութեամբ կարելի է դիմագրաւել այդ խոչընդոտները:

Իր կարգին, Ամեն. Հոգեւոր Տէրը  յայտնեց իր մտահոգութիւնները անդրադառնալով Լիբանանի ներկայ քաղաքկան լարուած իրավիճակի մասին խորհրդարանական ընտրութիւններու սեմին,  շեշտելով ժողովուրդին շահը հետապնդելու հրամայականը, յատկապէս տնտեսական եւ ընկերային հարցերով տագնապող ընկերութեան կեանքին մէջ:

Հանդիպման աւարտին Ամեն. Հոգեւոր Տէրը յաջողութիւն մաղթեց իր հիւրին եւ անոր նուիրեց  հայերէնի թարգմանուած Կաթողիկէ Քրիստոնէական Վարդապետութեան մասին հատորը:


Առօրեայ Աւետարանը
Այբ Էջ | Բովանդակութիւն | Հասցէարան | Օգտակար Կապեր | Նամականի
Ներքին Պրպտում՝  Armenian Keyboard
Կարդացէ՛ք այս էջը հետեւեալ լեզուներով.-    
Վերարտադրութեան ամէն իրաւունք վերապահուած է Հայ Կաթողիկէ Եկեղեցւոյ