Չորեքշաբթի, 8 Յուլիս 2015 - Նոր Կաթողիկոս Պատրիարքին ընտրութիւնը  նախախնամութեան ներշնչումով եւ հասարակութեան աղօթքով

 

Պէյրութ

Հայ Կաթողիկէ Եկեղեցւոյ արքեպիսկոպոսներու եւ եպիսկոպոսներու Սիւնհոդոսի ժողովը, որուն բացումը կատարուեցաւ 14 յուլիս 2015, երեքշաբթի առտու, ժամը 7.30-ին Սուրբ Պատարագով, պատմականօրէն բացառիկ կարեւորութիւն կը զգենու նկատի առած  անոր զուգադիպութիւնը շրջանէն ներս համայն քրիստոնէութեան եւ ասոնց շարքին հայկական պատմական գաղթօճախներուն համար ճակատագրային պայմաններուն, ինչպէս նաեւ Հայոց ցեղասպանութեան 100-րդ տարելիցի յիշատակումին առընչուած  համահայկական աշխատանքներուն, ուր կարեւոր դերակատարութիւն կը շարունակէ վերապահուած մնալ Հայ Կաթողիկէ Եկեղեցւոյ։

Այս իրողութիւններու գիտակցութիւնը վստահաբար իր տեղը ունեցաւ նախքան ընտրական ժողովի նիստերը՝  Սիւնհոդոսական Հայրերուն հոգեւոր ամփոփումի եւ խորհրդածութեան ամբողջ օրուան ընթացքին։ Զմմառու Տիրամօր հովանիին ներքեւ եւ Սուրբ Հոգիին օգնութեամբ  անոնք  խորհրդածեցին առաջնորդութեամբ  Լոտիի Մաուրիցիօ Մալվեսթիթի եպիսկոպոսին, որ Սուրբ Աթոռի Արեւելեան Եկեղեցիներու  Համաժողովի նախկին ենթա-քարտուղարն է։

Աղօթքի, ինքնամփոփումի եւ խորհրդածութեան այս հոգեշնչող պահերէն ետք է որ Սիւնհոդոսական Արքեպիսկոպոս եւ Եպիսկոպոս Հայրերը պիտի նստին դռնփակ ժողովի նոր  Կաթողիկոս Պատրիարքի ընտրութեան միակ օրակարգով։ «Ոչ ոքի արտօնուած է միջամուխ ըլլալ ո՛չ առաջ, ո՛չ ընթացքին եւ ո՛չ աւարտին» ըսուած է  կանոնագիրքին մէջ։ Միակ միջամտութիւնը Նախախնամութեանը պիտի ըլլայ՝ որ անսխալական է։  Իսկ հաւատացեալ հասարակութեան կը մնայ միայն աղօթել նոր Կաթողիկոս Պատրիարքի ընտրութեան այս գործընթացին յաջողութեամբ պսակումին համար։

 


Առօրեայ Աւետարանը
Այբ Էջ | Բովանդակութիւն | Հասցէարան | Օգտակար Կապեր | Նամականի
Ներքին Պրպտում՝  Armenian Keyboard
Կարդացէ՛ք այս էջը հետեւեալ լեզուներով.-    
Վերարտադրութեան ամէն իրաւունք վերապահուած է Հայ Կաթողիկէ Եկեղեցւոյ