Երկուշաբթի, 6 Յուլիս 2015 - Կիրակի 5 յուլիս 2015-ին, երեկոյեան ժամը 5:30-ին, Զմմառու վանքի եկեղեցւոյ մէջ, սուրբ Պատարագ մատուցան

 

Զմմառ

Կիրակի 5 յուլիս 2015-ին, երեկոյեան ժամը 5:30-ին, Զմմառու վանքի եկեղեցւոյ մէջ, սուրբ Պատարագ մատուցանեց Պատրիարքական Թեմի եւ Զմմառու Պատրիարքական Կղերի միաբանութեան Ընդհանուր Փոխանորդ եւ Զմմառու վանքի Մեծաւոր հայր Գաբրիէլ Թ.Ծ.Վ. Մուրատեան, ի հանգիստ նորօք հանցուցեալ երջանկայիշատակ Տէր Ներսէս Պետրոս ԺԹ. Տանն Կիլիկիոյ Կաթողիկէ Հայոց Կաթողիկոս Պատրիարքի հոգւոյն:
Մասնակցեցան Պատրիարքական Կառավարիչ արհիապատիւ Գրիգոր եպս. Կապրոյեան, Հայ Կաթողիկէ Արհի. Եպիսկոպոսներ եւ Առաջնորդներ, Պապական Նուիրակի եւ Մարոնի Պատրիարքի ներկայացուցիչներ, Յոյն, Ասորի բարձրաստիճան հոգեւորականներ

Զմմառու Պատրիարքական Միաբանութեան վարչութեան անդամներ եւ միաբան վարդապետներ, հայ կաթողիկէ ժողովրդապետներ, Լիբանանի տարբեր վանքերու եւ միաբանութիւններու Մեծաւորներ, կրօնաւորուհիներ, պետական, պաշտօնական եւ զինուորական անձնաւորութիւններ, Լիբանանի ՀՀ դեսպանութեան ներկայացուցիչ, հայ նախարարներ եւ երեսփոխաններ եւ հաւատացեալներու հոծ բազմութիւն մը: Պատարագի երգեցողութիւնը կատարուեցաւ «Կռունկ» Պատրիարքական երգչախումբի կողմէ, ղեկավարութեամբ՝ դոկտ. Եդուարդ Թոռիկեանի
:
Մեծաւոր Հայրը իր քարոզին մէջ անդրադարձաւ լուսահոգի Հոգեւոր Տիրոջ արժանիքներուն մասին, ըսելով. «Սիրելի Հոգեւոր Տէրը անխոնջ աշխատող մըն էր: Ան որպէս բարի հովիւ՝ մտահոգ էր հայ ժողովուրդի ներկայով, «Հովիւն քաջ զանձն դնէ ի վերայ ոչխարաց» (Յովհ Ժ 11): Անոր  համար հովուութիւն կը նշանակէր ամէնօրեայ նուիրում, ամէնօրեայ ծառայութիւն, ժամանակը ամբողջութեամբ տրամադրել հօտին, բաժնելով անոնց ուրախութիւնն ու ցաւը, անոնց իրագործումներն ու դժուարութիւնները, յաղթահարելով խոչընդոտները, եւ այդպիսով դառնալով իսկական քաջ և բարի հովիւը»: Հուսկ, Մեծաւոր Հայրը մաղթեց որ Հայ Կաթողիկէ Սիւնհոդոսական Հայրերը, Սուրբ Հոգւոյն օգնականութեամբ, ընտրեն Տանն Կիլիկիոյ Կաթողիկէ Հայոց արժանագոյն նոր հովուապետը
:
Պատարագի աւարտին՝ Հոգեհանգստեան պաշտօն կատարուեցաւ ի հանգիստ հանգուցեալ Հոգեւոր Տիրոջ հոգւոյն, որմէ ետք ցաւակցութիւններ ընդունուեցան մայրավանքի դահլիճին մէջ եւ ապա հոգեճաշ տեղի ունեցաւ դպրեվանքի սեղանատան մէջ:

 

 


Առօրեայ Աւետարանը
Այբ Էջ | Բովանդակութիւն | Հասցէարան | Օգտակար Կապեր | Նամականի
Ներքին Պրպտում՝  Armenian Keyboard
Կարդացէ՛ք այս էջը հետեւեալ լեզուներով.-    
Վերարտադրութեան ամէն իրաւունք վերապահուած է Հայ Կաթողիկէ Եկեղեցւոյ