Երեքշաբթի, 12 Մայիս 2015 - Ոչ եւս է Զմմառու միաբան հայր Սարգիս Ծ.Վ. Ուզունեան

 

 

Պէյրութ

ՄԱՀԱԶԴ

Հայ Կաթողիկէ Պատրիարքութիւնը եւ Զմմառու Պատրիարքական Միաբանութիւնը խոր վիշտով կը գուժեն Զմմառու Պատրիարքական Միաբանութեան երիցագոյն անդամներէն՝ հայր Սարգիս Ծ.Վ. Ուզունեանի վախճանումը, որ պատահեցաւ երկուշաբթի 4 մայիս 2015-ին, Աւստրալիոյ Մելպուռն քաղաքին մէջ:

Յուղարկաւորութեան եւ թաղման կարգը պիտի կատարուի Զմմառու վանքի մէջ, նախագահութեամբ Տանն Կիլիկիոյ Կաթողիկէ Հայոց տէր Ներսէս Պետրոս ԺԹ. Կաթողիկոս Պատրիարքին, «Փոխեալ Սրբոյ Կուսին» վանական եկեղեցւոյ մէջ, ուրբաթ 15 մայիս 2015-ին կէսօրէ առաջ ժամը 11:00-ին: Ապա հանգուեալին մարմինը պիտի զետեղուի միաբանական դամբարանին մէջ: Ցաւակցութիւնները պիտի ընդունուին Զմմառու վանքի «Սուրբ Միքայէլ» ընծայարանի դահլիճը:

Հանգուցեալ հայր Սարգիս Ծ.Վ. Ուզունեան  ծնած էր Հաճըն 22 ապրիլ 1922-ին: Զմմառու վանքին մէջ իր նախնական ուսումը աւարտելէ ետք, ան մեկնած էր Հռոմի Լեւոնեան Քահանայապետական հայ Վարժարան, ուր հետեւած էր իմաստասիրութեան եւ աստուածաբանութեան դասընթացքներու:
Քահանայ ձեռնադրուած էր Հռոմ 1 ապրիլ 1945-ին:
Ան պաշտօնավարած էր Զահլէ, Ժիւնիի Զմմառու Միաբանական դպրեվանք եւ Յորդանանի մէջ: Հանգուցեալ վարդապետը մեկնած էր Աւստրալիա 1967-ին եւ դժուարին պայմաններու տակ յաջողած էր հիմնել 2 ժողովրդապետութիւններ իրենց եկեղեցիներով: Լուսահոգի վարդապետը երկար տարիներ պաշտօնավարած էր Աւստրալիոյ Սիտնի եւ Մելպուռն քաղաքները որպէս հոգեւոր հովիւ, ուր եկեղեցւոյ սուրբ խորհուրդներով զօրացած կնքեց իր մահկանացուն:

Կիրակի 17 մայիս 2015-ին, Զմմառու վանքի մայր տաճարին մէջ պիտի մատուցուի սուրբ Պատարագ, ապա հոգեհանգստան պաշտօն պիտի կատարուի լուսահոգի վարդապետին հոգւոյն համար:

 

 


Առօրեայ Աւետարանը
Այբ Էջ | Բովանդակութիւն | Հասցէարան | Օգտակար Կապեր | Նամականի
Ներքին Պրպտում՝  Armenian Keyboard
Կարդացէ՛ք այս էջը հետեւեալ լեզուներով.-    
Վերարտադրութեան ամէն իրաւունք վերապահուած է Հայ Կաթողիկէ Եկեղեցւոյ