Չորեքշաբթի, 5 Նոյեմբեր 2014 - Մինասեան Արքեպիսկոպոսի ելոյթը Վիեննայի ''էքիւմենիկ'' ժողովին

Վիեննա

Հոկտեմբեր 25-26-ը Վիեննայի մէջ, Հալթպըրնի Ամրոցի մէջ Զալցպուրկի Արքեպիսկոպոս Գերշն. Տ. Անդրէաս Լաոնի նախաձեռնութեամբ տեղի ունեցած է միջ-եկեղեցական խորհրդաժողով մը՝ քրիստոնէական ընդհանուր արմատներու արժեւորումի, ''էքիւմենիկ'' երկխօսութեան զարգացման նպատակով։ Ելոյթին թեման էր. «Կիպրոսի Եկեղեցւոյ ընդհանուր քրիստոնէական արմատները՝ Երուսաղէմի Եկեղեցւոյ՝ Եկեղեցիներու Մօր, դիտակէտէն»: Այդ խորհրդաժողովը յարգանքի տուրք մըն էր Երուսաղէմի Եկեղեցիին եւ հրաժարեալ Քահանայապետ՝ Նորին Սրբութիւն Պենետիկտոս 16-րդին: Խորհրդաժողովին մասնակցած են Արեւելեան Կաթողիկէ եւ Ուղղափառ Եկեղեցիներու հոգեւորականներ, այլ քրիստոնէական յարանուանութիւններու ներկայացուցիչներ, Konigsegg-Aulendorf-ի կոմսը եւ կոմսուհին: Կիպրոսի Մարոնիթ Եկեղեցւոյ գլուխ Արքեպս. Ժոզէֆ Սուէյֆի առաջնորդութեամբ միասնական աղօթք բարձրացուած է վասն խաղաղութեան, որմէ յետոյ Հայաստանի, Վրաստանի, Ռուսիոյ եւ Արեւելեան Եւրոպայի հայ կաթողիկէներուն առաջնորդ արհիապատիւ հայր Ռաֆայէլ Արքեպս. Մինասեան Զալցպուրկի Արքեպիսկոպոսին հետ միասին մատուցած է Սուրբ Պատարագ` հայկական ծէսով, հայկական երգչախումբի երգեցողութեամբ: Խորհրդաժողովի ընթացքին ի թիւս այլոց, ելոյթով մը հանդէս եկած է նաեւ արհիապատիւ հայր Ռաֆայէլ Արքեպս. Մինասեան՝ ընդառաջելով կազմակերպիչներուն խնդրանքին՝ խօսելու Երուսաղէմի մէջ Հայ Կաթողիկէ համայնքին մասին: Սրբազան Հայրը նախ շնորհակալութիւն յայտնած է` իրեն այդ խորհրդաժողովին հրաւիրելու համար, նաեւ ըսած է, որ Աւստրիան շատ մօտ է հայ ժողովրդին եւ որ իրեն համար մեծ ուրախութիւն է յատկապէս Աւստրիոյ Քարիթասի եւ Հայկական Քարիթասի միջեւ համագործակցութիւնը: Ռաֆայէլ Սրբազան, նախքան անդրադառնալը Երուսաղէմի մէջ հայ կաթողիկէ համայնքին մասին , ամփոփ բայց բովանդակալից կերպով ներկայացուցած է Հայ Կաթողիկէ Եկեղեցւոյ պատմութիւնը: Ան փաստած է, որ Հայ Եկեղեցին ի սկզբանէ, մինչեւ 5-րդ դարուն կէսը, միասնական եղած է, առանց Կաթողիկէ եւ Առաքելական թեւերուն: Համառօտ անդրադարձ կատարելով Քաղկեդոնի ժողովի բանաձեւումներէն յետոյ Արեւմտեան եւ Արեւելեան քանի մը Եկեղեցիներու միջեւ առաջացած տարաձայնութիւններուն` Սրբազանը փաստած է, որ զանոնք սխալ մեկնաբանութիւններու հետեւանք էին, բայց, ցաւօք, ամուր տեղ գրաւած են հետագային Հայ Եկեղեցւոյ բաժանումին պատճառներուն մէջ: Նշանաւոր կաթողիկոսներ Ներսէս Շնորհալին, Ներսէս Լամբրոնացին եւ ուրիշներ, գիտակցելով, Ընդհանրական Եկեղեցւոյ հետ մէկ ըլլալու առանցքային կարեւորութիւնը, ջանքեր գործադրեցին վերականգնելու միութիւնը, բայց պատմական պայմանները թոյլ չտուին: Արքեպիսկոպոս Մինասեանը ուշադրութիւն հրաւիրած է յատկապէս այն փաստին վրայ, որ Հայ Կաթողիկէ Եկեղեցին, աւելի ստոյգ` հայ կաթողիկէ համայնքները չեն ծնած 18-րդ դարուն, այլ գոյութիւն ունեցած են հինէ ի վեր, գրեթէ ամենուր` թէ՛ Հայաստանի մէջ, թէ՛ հայկական գաղթավայրերուն մէջ, իսկ Աբրահամ Արծիւեանը վերահաստատեց Հայ Կաթողիկէ նուիրապետութիւնը Հալէպի մէջ, 1742 թուականին: Ներկայիս գոյութիւն ունեցող Հայ Կաթողիկէ Եկեղեցին ժառանգն է այն Հայ Եկեղեցւոյ, որ կառուցած է Սուրբ Գրիգոր Լուսաւորիչ, եւ որ կը պաշտպանէին Սուրբ Սահակը, Սուրբ Մեսրոպ Մաշտոցը, հայոց կաթողիկոսները, անիկա 16-17-րդ դարերուն Արեւելքի մէջ յառաջացած կաթողիկէ եկեղեցիներէն չէ: Հայ կաթողիկէները, որպէս ամբողջ հայ ժողովուրդի անբաժանելի մաս, իրենց ներդրումը ունեցած են ազգի զարգացումին մէջ, կիսած են բոլոր տառապանքները, ցեղասպանութեան նահատակներ դարձած են:
Խօսելով Երուսաղէմի մէջ հայ կաթողիկէ համայնքին մասին Սրբազան Հայրը պատմած է Վիա Տոլորոզա փողոցին վրայ Տիրամօր Չարչարանաց Եկեղեցւոյ կառուցման եւ հայ կաթողիկէ նուիրապետութեան ստեղծման մասին: Արհիապատիւ հայր Ռաֆայէլ Արքեպս. Մինասեանը 2005-2011 թուականներուն եղած է Երուսաղէմի եւ Ամմանի Պատրիարքական Փոխանորդ:
Սրբազան Հայրը իր ելոյթին մէջ անդրադարձած է նաեւ Հայաստանի, Վրաստանի, Ռուսիոյ եւ Արեւելեան Եւրոպայի հայ կաթողիկէ թեմի ձեւաւորումի, որ տեղի ունեցաւ համայնավարական ռեժիմի փլուզումէն յետոյ: Արքեպիսկոպոսը հպարտութեամբ ըսած է, որ այժմ Հայ Կաթողիկէ եւ Հայ Առաքելական նուիրապետութիւններու եւ համայնքներու միջեւ բարեկամական եւ փոխադարձ յարգանքի հիման վրայ զարգացող յարաբերութիւններ եւ համագործակցութիւն գոյութիւն ունի, որ կ՛օգնէ յաղթահարելու մեկուսացուած կենսաձեւը: «Այսօր մենք կը շարունակենք կառուցել եւ օգնել բոլոր հայերուն առանց խտրականութեան, Աւետարանի սիրով եւ յարգանքով, ընկերային, կրթական եւ այլ ոլորտներու մէջ». ընդգծած է Սրբազան Հայրը: Օգտակար տեղեկութիւններ ներկայացնելով կաթողիկէներու, կաթողիկէ գիւղերու եւ հոգեւորականներու թուաքանակին, կատարուող աշխատանքին մասին` թեմի առաջնորդը իր ելոյթին վերջաւորութեան ըսած է. «Ես կը սիրեմ տարբերութիւնները ազգերու եւ ժողովուրդներու միջեւ, բայց երբեք չեմ ընդունիր բաժանումը ընտանիքի մը անդամներուն միջեւ, որովհետեւ անոնք եղբայրներ ու քոյրեր են: Աստուծոյ Միածին Որդին…երկիր չեկաւ կաթողիկէներու, ուղղափառներու կամ բողոքականներու համար: Մենք անդամներն ենք մէկ մեծ ընտանիքի որ ի գիտութիւն ընդունինք այս իրականութիւնը յարգանքով եւ աւետարանական սիրով»:
Խորհրդաժողովին յաջորդ օրը` հոկտեմբեր 26-ին, մասնակիցները միասնական ուխտագնացութիւն կատարած են դէպի Մարիազէլի (Mariazell) սրբավայրը, ուր աղօթք բարձրացուցած են առ Աստուած` Երուսաղեմի Եկեղեցւոյ նպատակներուն եւ Մերձաւոր Արեւելքի ու Եւրոպայի եկեղեցիներուն միջեւ համամիութենական (œcuménique) երկխօսութեան առաջխաղացումի համար:


Առօրեայ Աւետարանը
Այբ Էջ | Բովանդակութիւն | Հասցէարան | Օգտակար Կապեր | Նամականի
Ներքին Պրպտում՝  Armenian Keyboard
Կարդացէ՛ք այս էջը հետեւեալ լեզուներով.-    
Վերարտադրութեան ամէն իրաւունք վերապահուած է Հայ Կաթողիկէ Եկեղեցւոյ