Ուրբաթ, 31 Հոկտեմբեր 2014 - Ամենապատիւ Հոգեւոր Տէրը իր մասնակցութիւնը բերաւ եպիսկոպոսական ընդհանուր Գ. Սիւնհոդոսին Վատիկանի մէջ

 

Հռոմ

4-19 Հոկտեմբեր 2014 Վատիկանի մէջ տեղի ունեցաւ Ընտանիքի հովուական մարտահրաւէրները աւետարանումի շրջագիծէն ներս նիւթով եպիսկոպոսական արտակարգ ընդհանուր երրորդ Սիւնհոդոսը, որուն իրենց մասնակցութիւնը բերած 191 սիւնհոդոսական հայրերու շարքին էր նաեւ Ամենապատիւ Տէր Ներսէս Պետրոս ԺԹ. Կաթողիկոս Պատրիարքը Տանն Կիլիկիոյ կաթողիկէ հայոց։

20 Հոկտեմբերին, Արեւելեան Կաթողիկէ եկեղեցիներու պատրիարքներու շարքին Հոգեւոր Տէրը իր մասնակցութիւնը բերաւ նաեւ Ֆրանչիսկոս Քահանայապետին գումարած կարդինալական վեհաժողովին։

Երեքշաբթի, 7 Հոկտեմբերի յետմիջօրէին Սիւնհոդոսի աշխատանքները շարունակուեցան շօշափելով «Ընտանիքի հովուական խնամատարութիւնը, ներկայացուած առաջարկներ» նիւթը։ Սոյն նիստին մասնակցեցան Սրբազան Քահանայապետը եւ 182 սիւնհոդոսական հայրեր։

Հնչած ելոյթներու շարքին արծարծուեցաւ կապը հաւատքի տագնապի եւ ընտանիքի տագնապի միջեւ։ Թելադրուեցաւ շարադրել Ընտանիքի Քրիստոնէականի մասին ուղեցոյց մը արժեւորելու համար անոր աւետարանական առաքելութիւնը։ Նաեւ շեշտը դրուեցաւ Ընտանիքի ժամանակակից մարտահրաւէրներուն վրայ, որոնց շարքին՝ արժէքներու տագնապը, անաստուածութեան աշխարհականութիւնը, իշխանութեան ձգտումը, որ կը կործանէ ընտանեկան կառոյցը ու զայն կ՚աղաւաղէ դիւրաբեկ դարձնելով անձերը եւ ընկերութիւնը։ Այս առընչութեամբ ընդգծուեցաւ ընտանիքներու հանդէպ եկեղեցւոյ ուշադրութեան աճի կարեւորութիւնը, անհատներու մէջ արթնցնելու համար ընտանիքի պատկանելիութեան իմաստին գեղեցկութիւնը։

Ըստ սիւնհոդոսական հայրերու, ընտանիքը կոչումներու օրրան է, որովհետեւ հոն է որ կոչումները կը հասուննան։

Նիստի ընթացքին խօսուեցաւ նաեւ Սուրբ Մկրտութեան եւ Սուրբ Պսակի խորհուրդներու միջեւ եղած կապի մասին, հաստատելով որ քրիստոնէական կեանքի սկզբնաւորութեան լուրջ կազմաւորումը կարելի կը դարձնէ Սուրբ Պսակի իմաստին խորը ըմբռնումը, որ պէտք չէ պարզ քրիստոնեայ աւանդութիւն մը նկատել այլ՝ ընդունիլ որպէս իսկական կոչում։

Զեկոյցներու ընթացքին խօսուեցաւ նաեւ ընտանիքներու ապրած առօրեային մասին, աշխատանքի ժամերու եւ ընտանեկան կեանքին ժամանակ յատկացնելու ներդաշնակ համակեցութեան պակասի մասին։

Լայնօրէն ակնարկուեցան նաեւ Աիրիկեան ցամաքամասի ընտանիքներուն դիմագրաւած մարտահրաւէրներուն՝ բազմա-ամուսնութեան, պատերազմներու, աղքատութեան եւ գաղթականութեան ցաւալի իրականութեան վերաբերող հարցեր ու, ինչպէս նաեւ ծննդաբերութեան կանխարգիլումի հարցին, որոնք կարիք ունին խոր աւետարանումի։ Միայն ասիկա է, որ կրնայ զարգացնել խաղաղութեան, արդարութեան եւ սիրոյ արժէքները միաժամանակ ի յայտ դնելով կնոջ դերը ընկերութեան մէջ եւ մանուկներու ու պատանիներու պատշաճ դաստիարակութիւնը եւ բոլոր բռնութիւններու զոհերու իրաւունքը։ Ընթացքին եղած միջամտութիւնները կեդրոնացան Եկեղեցւոյ ոճի եւ լեզուի համակերպումին աշխարհի լեզուին, որպէսզի ան հասկնալի դառնայ բոլորին, օգտագործելով նաեւ արդի ընկերային հաղորդակցութեան միջոցները։

Սիւնհոդոսի նիստերու ընթացքին Եկեղեցին յատկանշուեցաւ որպէս լոյս, որ կը լուսաւորէ եւ մարդիկը քայլ առ քայլ կ՚առաջնորդէ իրենց ուղեւորութեան ընթացքին։

Չորեքշաբթի, 8 Հոկտեմբերին նիստերը շարունակուելով՝ հնչած զեկոյցները ծաւալեցան Ընտանիքի հովուական մարտահրաւէրներուն շուրջ յատուկ կերպով անդրադառնալով հաւատքի եւ ընտանիքի տագնապի, ընտանիքներու ապրած դժուարութիւններուն եւ ընտանիքի դէմ գործադրուած արտաքին ճնշումներու շուրջ։

Կէսօրէ ետք նիստերու ընթացքին ժողովական հայրերու միջամտութիւններու նիւթ հանդիսացան Ընտանեկան յատուկ պարագաները եւ միեւնոյն սեռի պատկանող անձերու միջեւ միութիւնը։ Նիստերը վերջ գտան երեկոյեան ժամը 7։00-ին։

Նշենք նաեւ թէ Հոգեւոր Տէրը` Կիրակի, 19 հոկետմբերին, ի շարս բոլոր միւս սիւնհոդոսական հայրերուն, սուրբ Պետրոս հրապարակին վրայ մասնակցեցաւ սիւնհոդոսի եզրափակիչ արարողութեան, որուն ընթացքին Ֆրանչիսկոս Պապը երանելի հռչակեց երջանկայիշատակ Պօղոս Զ Քահանայապետը։ 
Ամենապատիւ Հոգեւոր Տէրը այս առթիւ երկարաշունչ հարցազրոյց մը ունեցաւ Վատիկանի Ձայնասփիւռի հայկական բաժնին հետ, որուն ընթացքին անդրադարձաւ վերոյիշեալ ժողովներու մասին, խօսելով նիստերու ընթացքին իր ունեցած ելոյթին եւ Հայ ընտանիքի իրավիճակին մասին։

Երեքշաբթի, 21 հոկտեմբեր 2014-ին, Տանն Կիլիկիոյ Կաթողիկէ Հայոց` Ամենապատեւ Տէր Ներսէս Պետրոս ԺԹ. Կաթողիկոս Պատրիարքը, վերադարձաւ Լիբանան։

 


Առօրեայ Աւետարանը
Այբ Էջ | Բովանդակութիւն | Հասցէարան | Օգտակար Կապեր | Նամականի
Ներքին Պրպտում՝  Armenian Keyboard
Կարդացէ՛ք այս էջը հետեւեալ լեզուներով.-    
Վերարտադրութեան ամէն իրաւունք վերապահուած է Հայ Կաթողիկէ Եկեղեցւոյ