Երկուշաբթի, 27 Հոկտեմբեր 2014 - 15 ամեակ ամենապատիւ Հոգեւոր Տիրոջ գահակալութեան

              Պէյրութ

Հայ Կաթողիկէ Եկեղեցւոյ եւ ընդհանրապէս համայնքի պատանի,երիտասարդ,աւագ եւ երէց սերունդի ներկայացուցիչներ ուրբաթ,24 հոկտեմբեր 2014 -ի երեկոյեան լեցուցած էին  Սրբոյ Կուսին Աւետման Եկեղեցին, միանալու համար ամենապատիւ Տէր Ներսէս Պետրոս ԺԹ. Տանն Կիլիկիոյ կաթողիկէ հայոց Կաթողիկոս Պատրիարքի գոհաբանական աղօթքին՝ զոր ան, շրջապատուած գերապայծառ, գերապատիւ եւ արժանապատիւ հայրերուն եւ Զմմառու պատրիարքական Միաբանութեան զոյգ նորընծայարաններու սաներուն կողմէ,  բարձրացուց առ Աստուած իր գահակալութեան 15  ամեակին առիթով։ Յընթացս գոհաբանական արարողութեան արտասանած քարոզին մէջ, Ան փառք տուաւ Աստուծոյ՝ Եկեղեցւոյ, ազգին ու հաւատացեալ հասարակութեան իր ծառայութեան  15 տարիներու ամբողջ տեւողութեան իրեն պարգեւած  շնորհներուն համար։ Ան միաժամանակ շեշտեց աշխարհականներու առաքելութեան կարեւորութիւնը Եկեղեցիէն ներս,  հաւաստիացնելով որ ամէն մկրտուած քրիստոնեայ կոչուած է դառնալու աւետարանիչ։  Այս գիտակցութեամբ ու պատրաստակամութեամբ օժտուած աշխարհականները կը կազմեն իր գլխաւորած Եկեղեցւոյ մարմնին անդամները, որոնցմէ իւրաքանչիւրը ունի իր կարեւոր տեղն ու դերը հովուապետի ծառայողական պարտականութեան մէջ։

Յաւարտ գոհաբանական արարողութեան, որ յատկանշուեցաւ Զմմառեան միաբանաւոթեան դպրեվանքի սաներուն կողմէ կատարուած հոգեպարար շարականներու երգեցողութեամբ, ամենապատիւ Հոգեւոր Տէրը Պատրիարքարանի դահլիճին մէջ ընդունեց ներկաներուն շնորհաւորութիւններն ու բարեմաղթանքները, որոնց թարգմանը հանդիսացան յատկապէս Զմմառու դպրեվանքի նորընծաները Հայրապետական Օրհներգի իրենց  կատարումով։

 


Առօրեայ Աւետարանը
Այբ Էջ | Բովանդակութիւն | Հասցէարան | Օգտակար Կապեր | Նամականի
Ներքին Պրպտում՝  Armenian Keyboard
Կարդացէ՛ք այս էջը հետեւեալ լեզուներով.-    
Վերարտադրութեան ամէն իրաւունք վերապահուած է Հայ Կաթողիկէ Եկեղեցւոյ