Երկուշաբթի, 29 Հոկտեմբեր 2012 - Նոր Աւետարանացման Եպիսկոպոսական ԺԳ. Սիւնհոդոսի եզրափակիչ Պատարագ


Վատիկան

Կիրակի 28 հոկտեմբեր 2012, առաւօտեան ժամը 9.30-ին, Վատիկանի Սուրբ Պետրոս մայր տաճարին մէջ տեղի ունեցաւ «Նոր Աւետարանացումը ի սպաս քրիստոնէական հաւատքի փոխանցման» խորագրով կաթողիկէ Եկեղեցւոյ եպիսկոպոսաց ԺԳ. սիւնհոդոսի եզրափակիչ արարողութիւնը, նախագահութեամբ Բենեդիկտոս ԺԶ. Սրբազան Քահանայպետին եւ մասնակցութեամբ բոլոր սիւնհոդոսական հայրերուն:


Արարողութեան ընթացքին իր արտասանած քարոզին մէջ Սրբազան Քահանայապետը մեկնաբանեց օրուան սուրբ Գրային ընթերցումը, որ քաղուած էր Մարկոսի Աւետարանէն, եւ կը խօսի Երիքովի Բարտիմէոս կոյրի բուժումի մասին։ Սրբազան Հայրը մատնանշեց թէ Մարկոս աւետարանիչի բոլոր աւետարանը հաւատքի ուղեւորութիւն մըն է, որ աստիճանաբար կը զարգանայ Յիսուսի դպրոցին մէջ եւ աշակերտները այս հաւատքի յատնաբերումի առաջին դերակատարներն են, բայց անոնց կից կան նաեւ ուրիշ դերակատարներ, եւ ասոնց շարքին է՝ Բարտիմէոս կոյրը։
Յիսուսի գործած այս հրաշքը, իր չարչարանքներէն առաջ, վերջինն է։ Ան կը բանայ կոյրի մը աչքերը։ Անձի մը, որ կորսնցուցած էր լոյսի տեսողութիւնը։ Կոյրի պատկերը կը ներկայացնէ մարդը, որ Աստուծոյ լոյսին եւ հաւատքի լոյսին կարօտը ունի, որպէսզի կարենայ ճանչնալ իսակական ճշմարտութիւնը եւ քալել կեանքի ուղիղ ճանապարհով։ Արդ հիմնական է ճանչնալ մեր կուրութիւնը եւ լոյսի մեր կարիքը ապա թէ ոչ կոյր կը մնանք յաւիտեան։
Բարտիմէոս կոյրը ներկայացուած է որպէս օրինակ։ Ան ծնունդէն ի վեր կոյր մը չէ այլ իր տեսողութիւնը կորսնցուց աւելի ուշ։ Մարդն է, որ գիտակից է թէ լոյսը կորսնցուցած է բայց տակաւին տոգորուած է յոյսով եւ գիտէ Յիսուսի հետ հադիպման առիթը արժեւորել ու բուժուելու համար կը յանձնուի Անոր ըսելով. «Որդի Դաւիթի, Յիսուս, գթա՛ վրաս»: Յիսուսի հետ այս հանդիպումով Բարտիմէոսի աչքերը կը բացուին եւ ան կը շարունակէ իր ուղեւորութիւնը, ունենալով Յիսուսը որպէս իրեն առաջնորդ։ Աւետարանիչը ուրիշ բան չ՛ըսեր Բարտիմէոսի մասին բայց անոր միջոցաւ մեզի կը ներկայացնէ ահա թէ ո՞վ է աշակերտը: Աշակերտը այն անձն է, որ հաւատքի լոյսով կը հետեւի Յիսոուսին։

Նորին Սրբութիւնը ապա մէջբերեց Սուրբ Օգոստոնոսի մեկնաբանութիւնը այս հատուածի մասին եւ զայն կապեց նոր աւետարանացման սիւնհոդոսի ընթացքին շօշափուած եւ քննարկուած նիւթերուն։
Բարտիմէոս կոյրը կրնայ ներկայացնել հինաւուրց աւետարանացուած այն շրջանները, ուր հաւատքի լոյսը այլեւս տկարացած է։ Անոնք հեռացած են Աստուծմէ... եւ իրենց կեանքի ուղեցոյցը կորսնցուցած: Շատ են այն անձերը որ կարիքը ունին նոր աւետարանացման, այսինքն Քրիստոսի հետ նոր հանդիպումին։
«Նոր աւետարանութիւնը համայն եկեղեցւոյ կը պատկանի» ըսաւ Սրբազան Հայրը եւ մատնանշեց սիւնհոդոի նիստերէն ի յայտ եկած իրողութիւններուն, նա մանաւանդ հովուական գետնի վրայ առաջադրուած քայլերուն, հաստատելով որ Եկեղեցին պարտականութիւնը ունի աւետարանելու եւ մարդոց հռչակելու փրկութեան պատգամը, մանաւանդ անոնց որոնք տակաւին չեն ճանչնար Յիսուս Քրիստոսը։

Արդ հարկ է աղօթել Սուրբ Հոգւոյն որպէսզի Եկեղեցւոյ մէջ յարուցէ միսիոնարական նոր ուժականութիւն մը, որուն դերակատարներն են հովութեամբ զբաղող կղերական դասն ու աշխարհականները։

Նորին Սրբութիւնը ապա ակնարկեց Եկեղեցւոյ վերաւետարանացման առաքելութեան ի սպաս գործածելիք նոր կերպերու, որոնք այսօրուայ մշակոյթին կը համակերպին եւ որ Քրիստոսի ճշմարտութիւնը հաղորդեն երկխօսութեան ու բարեկամական վերաբերմունքով, որ իր հիմը կը գտնէ Աստուծոյ մէջ, որն է՝ Սէր։

«Սիրելի եղբայրներ ու քոյրեր - յարեց Սրբազան Քահանայապետը խօսքը եզրափակելով - Բարտիմէոս կոյրը իր տեսողութիւնը վերագտնելով աշակերտեց Յիսուսին: Այսպէս են նաեւ Աւետարանի նոր քարոզիչները։ Անձեր, որոնք Աստուծոյ փորձառութիւնը կ՛ապրին եւ կը գտնեն սրտի ուրախութիւնը։ Մենք եւս դիմենք Յիսուսին եւ մեր աչքերուն առջեւէն թող խաւարը փարատի եւ գիտնանաք փարաւորել իսկական Աստուածը։ Ամէն»։

http://hy.radiovaticana.va/Articolo.asp?c=633702
 


Առօրեայ Աւետարանը
Այբ Էջ | Բովանդակութիւն | Հասցէարան | Օգտակար Կապեր | Նամականի
Ներքին Պրպտում՝  Armenian Keyboard
Կարդացէ՛ք այս էջը հետեւեալ լեզուներով.-    
Վերարտադրութեան ամէն իրաւունք վերապահուած է Հայ Կաթողիկէ Եկեղեցւոյ