Չորեքշաբթի, 18 Յուլիս 2012 - 2013-ի Խաղաղութեան Համաշխարհային Օրուայ խորագիրը՝ «Երանի Խաղաղարարներուն»


Վատիկան

2013-ի Խաղաղութեան 46-րդ Համաշխարհային Օրուան համար, Սրբազան Քահանայապետ Բենեդիկտոս ԺԶ.ի պատգամին խորագիրն է՝ «Երանի Խաղաղարարներուն», ներշնչուած սուրբ Մատթէոսի աւետարանէն՝ «Երանի խաղաղարարներուն, անոնք Աստուծոյ զաւակները պիտի կոչուին» (Մատթ 5, 9)։

Խաղաղութեան ու Արդարութեան Քահանայապետական Խորհուրդը կը հաստատէ թէ այս պատգամը կը միտի քաջալերել բոլոր մարդիկը յանձնառու ըլլալու խաղաղութեան հաստատումին մէջ, ներկայ դժուար պայմաններուն ներքեւ։ Քահանայապետական խորհուրդը կը նշէ թէ Սրբազան Քահանայապետին պատգամը նկատի կ՚առնէ խաղաղութեան գաղափարականին ամբողջականութիւնն ու բազմազանութիւնը, մեկնելով մարդուն ներքին ու արտաքին խաղաղութենէն։ Պատգամը նաեւ կ՚ընդգծէ մարդ անհատի ըմբռնումին կարեւորութիւնը, ինչպէս նաեւ հիմնական իրաւունքները, որոնց առաջին հերթին կու գան խղճի, արտայայտութեան եւ կրօնական ազատութիւնները։

Պատգամը կ՚անդրադառնայ նաեւ այն նախաձեռնութիւններուն որոնք կը միտին դիմագրաւելու «տնտեսական ու նիւթական» տագնապները, կրթութեան «անմիջական» անհրաժեշտութիւնը, «քաղաքական ու պետական հաստատութիւններու» խնդիրները եւ յաճախ «ժողովրդավարութեան լուրջ տագնապը»։ Ան նաեւ շեշտը կը դնէ մարդու «արժանապատուութեան եւ ազատութեան» վրայ, մեկնելով Յովհաննէս ԻԳ. Պապի «Խաղաղութիւն Յերկրի» (Pacem in Terris) շրջաբերականէն, կերտելու համար քաղաքացիական միջավայր մը ի սպաս իւրաքանչիւրին, առանց խտրականութեան եւ ընդհանուր բարիքին համար։

 


Առօրեայ Աւետարանը
Այբ Էջ | Բովանդակութիւն | Հասցէարան | Օգտակար Կապեր | Նամականի
Ներքին Պրպտում՝  Armenian Keyboard
Կարդացէ՛ք այս էջը հետեւեալ լեզուներով.-    
Վերարտադրութեան ամէն իրաւունք վերապահուած է Հայ Կաթողիկէ Եկեղեցւոյ