Երեքշաբթի, 29 Մայիս 2012 - Երուսաղէմի մէջ հանդիպում Եկեղեցիներու Միութեան Քահանայապետական Խորհուրդի նախագահին հետ


Երուսաղէմ

Չորեքշաբթի, 23 մայիս 2012-ին, երեկոյեան ժամը 6.30-ին, Երուսաղէմի «Նօթրը-Տամ» շքեղ պանդոկի սրահներէն մէկուն մէջ տեղի ունեցաւ Երուսաղէմի համայնքապետերու հանդիպումը Հռոմէն ժամանած` Եկեղեցիներու Միութեան Քահանայապետական Խորհուրդի նախագահ կարդինալ Քիւրդ Քոխին հետ։
Առաքելական Նուիրակը` արհիապատիւ Անթօնիօ Ֆրանքօ ներկայացուց բոլոր եկեղեցապետերը Ծիրանաւորին, որ բազմազան լեզուներով, ամէնուն ալ իր սիրալիր ողջոյնը ուղղեց։
Նախ խօսք առաւ Յունաց Պատրիարքը` Թէոֆիլոս Գ., որ բոլոր համայնքներու կողմէ բարի գալուստ մաղթեց կարդինալին, ներկայացնելով Երուսաղէմը որպէս պատրաստ դաշտ մը համամիութենական համագործակցութեան: Ապա, Լատիններու  Ֆուատ Թուալ պատրիարքը նշեց թէ որքան մեծ ուրախութիւն է բոլորին  համար ընկալել սրբազան պապի կողմէ ուղարկուած այս շատ սիրելի անձնաւորութիւնը, որուն հետ արդէն գործակցելու առիթներ ունեցած է եւ գնահատած անոր գործելակերպն ու գաղափարները այս ուղղութեամբ: Ան աւելցուց, թէ Երուսաղէմի բոլոր եկեղեցապետերը կողմնակից են լուծումներ գտնելու եւ ոչ թէ յաւելեալ դժուարութիւններ յարուցանելու։
Պաղեստինցի քրիստոնեաներու կողմէ խօսնակ մը պարզեց այն բոլոր դժուարութիւնները, որոնց կը հանդիպին երկրի արաբ քրիստոնեայ բնակիչները մանաւանդ երթեւեկութեան վերաբերեալ, իրենց իսկ բնակած երկրին մէջ։
Կարդինալը իր պատասխանին մէջ ընդգծեց սրբազան պապին կողմէ  Սուրբ Երկրի քրիստոնեաներուն տրուած առաջնահերթ կարեւորութիւնը, ինչպէս նաեւ այն բոլոր ջանքերը որոնք ի գործ կը դրուին հարթելու համար զանազան դժուարութիւնները տեղական իշխանութեանց հետ։
Այնուհետեւ պանդոկին բացօդեայ մեծ պատշգամին մէջ տեղի ունեցաւ հիւրասիրութիւն ներկայութեամբ նաեւ հայ կաթողիկէ Եկեղեցւոյ առաջնորդ` գերապայծառ հայր Յովսէփ ծ.վ. Քէլէկեանի:


Առօրեայ Աւետարանը
Այբ Էջ | Բովանդակութիւն | Հասցէարան | Օգտակար Կապեր | Նամականի
Ներքին Պրպտում՝  Armenian Keyboard
Կարդացէ՛ք այս էջը հետեւեալ լեզուներով.-    
Վերարտադրութեան ամէն իրաւունք վերապահուած է Հայ Կաթողիկէ Եկեղեցւոյ