Հինգշաբթի, 29 Մարտ 2012 - Երջանկայիշատակ Գասպարեան Հոգեւոր Տիրոջ առաջին տարելիցին առիթով՝ Ակադեմական Յուշահանդէս


Պէյրութ

Նախագահութեամբ՝ ամենապատիւ եւ գերերջանիկ տէր Ներսէս Պետրոս ԺԹ. Կաթողիկոս Պատրիարքին Տանն Կիլիկիոյ Կաթողիկէ Հայոց, կազմակերպութեամբ՝ հայ կաթողիկէ պատրիարքական թեմին, շաբաթ 24 մարտ 2012-ին, հայ կաթողիկէ պատրիարքարանի ՀԿՄ.ի «Արարատեան» սրահէն ներս տեղի ունեցաւ երջանկայիշատակ Յովհաննէս Պետրոս ԺԸ. Կաթողիկոս Պատրիարքի վախճանման առաջին տարելիցին առիթով Ակադեմական Յուշահանդէս։ Յուշահանդէսին ներկայ գտնուեցան արհի. հայր Յովհաննէս եպս. Թէյրուզեան եւ Հայաստանի, Վրաստանի, Ռուսիոյ եւ Արեւելեան Եւրոպայի թեմի առաջնորդ՝ արհի. հայր Ռաֆայէլ արք. Մինասեան, գերապատիւ վարդապետներ եւ արժանապատիւ քահանաներ, ինչպէս նաեւ Լիբանանի մօտ Հայաստանի հանրապետութեան դեսպանին ներկայացուցիչը՝ Պր. Վարդան Ադամեան, պետական երեսփոխան՝ մեթր Սերժ Թուրսարգիսեան, նախկին նախարար Մեթր Ժագ Չուխատարեան, հայկական կուսակցութիւններու ներկայացուցիչներ, մտաւորականներ, հայ կաթողիկէ մարմիններու ու կառոյցներու պատասխանատու անձնաւորութիւններ եւ հաւատաւոր համայնքի զաւակներ։

Լիբանանի եւ Հայաստանի  քայլերգներէն ետք, Օրդ. Մարալ Աթէշեան բացման խoսքով ողջունեց ներկաները։ Իր խoսքին մէջ ան հակիրճ կենսագրական պատմականով մը անդրադարձաւ երջանկայիշատակ Գասպարեան Կաթողիկոս Պատրիարքին՝ բարի հովիւին, խոհեմ ու դիւանագէտ կրoնաւորին, ինչպէս նաեւ իմաստուն եւ շրջահայեաց Կաթողիկոս Պատրիարքի վաստակին։
30 արագասլաց երկվայրկեաններով ներկայացուած երջանկայիշատակ Գասպարեան Հոգեւոր Տիրոջ թաւշային ձայնը յուզեց ներկաները եւ ակնթարթի մը համար Զինք շօշափելի ներկայութիւն դարձուց իրեն այնքան սիրելի համայնքի զաւակներու կողքին։
Ձայնագրութեան ունկնդրութենէն ետք, գերյ. հայր Յովսէփ ծ.վ. Թոփալեան՝ «Դո՛ւ Վեհափա՜ռ» բանաստեղծական շունչով արտասանուած սրտի խօսքով՝ հանդիսականներուն յիշողութիւնը թարմացուց Գասպարեան Հոգեւոր Տիրոջ մասին, կատարելով անոր անզուգական տիպարի արժեւորումը եւ ներկայացնելով  վսեմ ու սիրալիր, ազնիւ հոգիի եւ լուսաշող գորով եւ սիրազեղ կորով բարիքի, ճշմարտութեան ու ժպիտի Վեհափառ ը, որ կը փութար կարoտեալին եւ չքաւորին, խաղաղութեան դրoշը կը ծածանեցնէր Լիբանանի պատմութեան վատագոյն շրջանին։
«Սուրբ Գրիգոր Նարեկացի» կեդրոնի արտադրութեամբ՝  նոյն կեդրոնի հայագիտական գրասենեակի վարիչ Վարդան Թաշճեանի հեղինակած կենսավաւերագրական տեսաերիզի տպաւորիչ ցուցադրութեան յաջորդեց Հայաստանի եւ Արեւելեան Եւրոպայի թեմի առաջնորդ՝ արհի. Ռաֆայէլ արք. Մինասեանի բանախoսութիւնը, ուր հակիրճ կերպով երջանկայիշատակ Գասպարեան Հոգեւոր Տիրոջ կենսագրականին անդրադառնալէ  ետք, ան լուսարձակի տակ առաւ խաղաղութեան եւ սիրոյ դեսպան՝ Կաթողիկոս Պատրիարքին տիպարը, որ իր բարեխoսի եւ խաղաղասէր նկարագրով հաշտարարի դերակատարութեամբ հոգեւորականներուն եւ աշխարհականներուն միջեւ, ամէն տեսակի բարեխoսութիւն կը կատարէր համայնքին շահերը գերադասելով բոլոր շահերուն։

Այնուհետեւ, ջութակի զուգանուագով ելոյթ ունեցան Արմէն եւ Աշոտ Ճենտերեճեանները, ընկերակցութեամբ դաշնակահար  Իզապէլ Գայայեանի։
Ականատեսի վկայութեամբ հանդէս եկաւ Պր. Սարգիս Նաճարեան, որ  նկարագրեց Սպիտակի երկրաշարժին առիթով երջանկայիշատակ Հոգեւոր Տիրոջ Հայաստան ուղեւորութենէն եւ Սբ. Էջմիածին ու աղէտի գօտի այցելութենէն դրուագներ, անոնց ընդմէջէն վեր առնելով  ԺԸ Հոգեւոր Տիրոջ միանգամայն վեհանձն եւ խոնարհ էութիւնը, գորովալի ու բարեգործ Մեծ Մարդուն բարեսրտութիւնը եւ մանաւանդ ազգասէր, հայրենասէր եւ իր համայնքի զաւակները սիրող հոգեւոր առաջնորդին մարդկային վերաբերմունքն ու հաղորդականութիւնը։

«Կռունկ» Պատրիարքական երգչախումբը, ղեկավարութեամբ դոկտ. Էտուար Թորիկեանի եւ դաշնակահար Թամար Գասապեանի ընկերակցութեամբ, փունջ մը դասական երգերու կատարումով  գեղարուեստական վայելքի պահ մը պարգեւեց ներկաներուն։

Ապա, գերապատիւ հայր Վարդան վրդ. Գազանճեան բեմ բարձրանալով, Մեսրոպ Հայունիի «Տեսայ ձեզ, ճանչցայ ձեզ եւ շատ սիրեցի ձեզ» նորատիպը ներկայացուց, գիտական եւ գրախoսական հայեցողութ եամբ մը, անդրադառնալով հատորին բովանդակութեան հիմնական բաժիններուն։ Ան նկատել տուաւ թէ սոյն հատորը հայ կաթողիկէ համայնքէն ներս վաւերագրական եւ կարեւոր  արժէք կը ներկայացնէ,  եւ կարելի է զայն որպէս աղբիւր oգտագործել գիտական ուսումնասիրութիւններու եւ պատմական վկայութիւններու համար։

Հուսկ, գերապատիւ հայր Սեպուհ վրդ.Կարապետեան կատարեց նորատիպին շնորհահանդէսի կարգը եւ գինեձoնի արարողութիւնը, մասնակցութեամբ արժանապատիւ տէր Կարապետ քհնյ. Թադէոսեանի, հատորին հեղինակ՝ Մեսրոպ Հայունիի եւ մեկենաս՝ մեթր Ժագ Չուխատարեանին, ինչպէս նաեւ արհիապատիւ ու գերապատիւ վարդապետներուն։ Աւանդական գինեձoնը դիմաւորուեցաւ ներկաներուն ծափողջոյններով։

Շնորհահանդէսի աւարտին, ամենապատիւ եւ գերերջանիկ տէր Ներսէս ԺԹ. Կաթողիկոս Պատրիարքը բեմ բարձրանալով, իր եղբայրակից՝ երջանկայիշատակ Գասպարեան Հոգեւոր Տիրոջ կենսագրական գիծերուն ընդմէջէն նշեց երջանկայիշատակին ժպտերէս եւ բարեացակամ հոգեւոր տիպարը, որ պատասխանատուութեան հոգիով Աստուծոյ կողմէ իրեն յանձնարարուած պաշտoնը կը կատարէր ամենայն հեզութեամբ, «Ասոր համար - ըսաւ ան - շատեր եւ ոչ միայն մեր կաթողիկէ զաւակները, այլ նաեւ ոչ հայ լիբանանցիներ ամէն համայնքէ եւ ծէսէ, կը փնտռէին անոր սփոփարար խoսքը»։
Ամենապատիւ Հոգեւոր Տիրոջ Պահպանիչով վերջ գտաւ ակադեմական այս յիշարժան ու տպաւորիչ  յուշահանդէսը, որուն աւարտին բոլոր ներկաները ստացան նորատիպի հատորէն oրինակներ։
c

 

 


Առօրեայ Աւետարանը
Այբ Էջ | Բովանդակութիւն | Հասցէարան | Օգտակար Կապեր | Նամականի
Ներքին Պրպտում՝  Armenian Keyboard
Կարդացէ՛ք այս էջը հետեւեալ լեզուներով.-    
Վերարտադրութեան ամէն իրաւունք վերապահուած է Հայ Կաթողիկէ Եկեղեցւոյ