Երեքշաբթի, 6 Մարտ 2012 - Սարկաւագի ձեռնադրութիւն Պրազիլի մէջ

Սան Փաուլօ, Պրազիլ

Կիրակի, 12 փետրուար 2012-ին, Սան Փաուլոյի (Պրազիլ) Սուրբ Գրիգոր Լուսաւորիչ աթոռանիստ եկեղեցւոյ մէջ, արհիապատիւ Վարդան եպս. Պօղոսեան սարկաւագ ձեռնադրեց Ֆապիօ Տա Սիլվէյրա Վակնէրը, որ Միքայէլ անունը առաւ եւ խորհրդականօրէն նմանեցաւ Քրիստոսի, որ ինքզինք բոլորին ծառան ըրաւ։ Միքայէլ սարկաւագ պիտի նուիրուի Աւետարանը հռչակելու եւ քարոզելու առաքելութեան եւ քրիստոնեայ հասարակութեան ծառայութեան, մանաւանդ օգնելու համար եպիսկոպոսին եւ քահանաներուն սուրբ Պատարագի եւ խորհուրդներու արարողութիւններուն ընթացքին։ Ան պիտի աղօթէ Եկեղեցւոյ հասարակաց աղօթքները։
Սուրբ Ստեփանոս Նախավկայի օրինակին համաձայն եւ այնպէս ինչպէս հայ ծէսին ձեռնադրութեան արարողութիւնը կը նախատեսէ, սարկաւագները կը զգենուն սուրբ Հոգիին զօրութիւնը եւ պարգեւները, որպէսզի բարի գործեր կատարեն «խնկարկելով սուրբ Եկեղեցին, բարի վարքով եւ առաքինազարդ գործերով բոլորին ուրախութեան համար»։

 

Նոր ձեռնադրեալ սարկաւագը 34 տարեկան է, պրազիլիացի, ծնած է՝ Բորանկապա, Սան Փաուլօ։ Իր աստուածաբանական ուսումը կատարած է Րիօ Տը Ժանեյրոյի արքեպիսկոպոսական նոր ընծայարանին մէջ։ Փոքր կարգերը եւ կիսասարկաւագութիւնը ստացած է Սան Փաուլոյի հայ կաթողիկէ աթոռանիստ եկեղեցւոյ մէջ, որմէ ետք անցած է Պուէնոս Այրէս, Արժանթին, ուր շրջան մը անցուցած է ուսումնասիրելով հայոց պատմութիւնը, լեզուն եւ ծէսը։ Այժմ կը պատրաստուի 6 ամսուան համար մեկնելու Հայաստան, ուր որպէս սարկաւագ պիտի ծառայէ Քանաքեռի հայ կաթողիկէ ժողովրդապետութեան մէջ։ Միքայէլ սարկաւագ այն անձերէն է, որոնք լսելով Աստուծոյ կոչը, ձգեցին տուն, եղբայրներ, քոյրեր, հայր, մայր... Աստուծոյ արքայութեան  եւ աւելի մեծ ազատութեամբ ծառայելու համար հոն ուր պիտի ղրկուին։
Լատին Եկեղեցւոյ կղերիկոսները յաճախ ներդրում ունեցած են հայ կաթողիկէ Եկեղեցւոյ մէջ եւ անոնք, զգացուած հայ կաթողիկէ առաջնորդութեան պահանջներէն, պատրաստակամութիւն յայտնած են ծառայելու Քրիստոսի արքայութեան այն բաժնին մէջ, ուր ծաղկուն է հայ մշակոյթը, հայ ծէսը եւ հայերէն լեզուն։


Առօրեայ Աւետարանը
Այբ Էջ | Բովանդակութիւն | Հասցէարան | Օգտակար Կապեր | Նամականի
Ներքին Պրպտում՝  Armenian Keyboard
Կարդացէ՛ք այս էջը հետեւեալ լեզուներով.-    
Վերարտադրութեան ամէն իրաւունք վերապահուած է Հայ Կաթողիկէ Եկեղեցւոյ