Շաբաթ, 26 Մարտ 2011 - Մարոնիթ նոր պատրիարքին գահակալութեան հանդիսաւոր արարողութիւնը

 

Պքերքէ

Ուրբաթ, 25 մարտ 2011, երեկոյեան ժամը 5-ին տեղի ունեցաւ մարոնիթ նորընտիր պատրիարք Պշարա Ալ Րայիի գահակալութիւնն ու իշխանութեան տուուչութիւնը եւ հանդիսաւոր սուրբ Պատարագ մարոնիթ եկեղեցւոյ պատրիարքական աթոռին մօտ, Պքերքէ։

Սուրբ պատարագին նախագահեց վաստակաւոր Սֆէր պատրիարքը մասնակցութեամբ եպիսկոպոսական դասին: Պատարագէն ետք, եւ ըստ մարոնիթ եկեղեցւոյ աւանդութեան կատարուեցաւ գահակալութեան բուն արարողութիւնը եւ հովուական գաւազանի փոխանցումը: Այս հանդիսաւոր արարողութեան ներկայ գտնուեցան Լիբանանի պետական բարձրաստիճան պատասխանատուներ, հոգեւոր եւ քաղաքական պետեր, Լիբանանի եւ Սուրիոյ առաքելական նուիրակները եւ մարոնիթ եկեղեցւոյ զանազան ներկայացուցիչներ։ Հայ կաթողիկէ ներկայացուցչութիւնը եղաւ մասնակցութեամբ Ամենապատիւ Հոգեւոր Տէր Ներսէս Պետրոս ԺԹ. կաթողիկոս պատրիարքին, Հալէպի առաջնորդ արհիապատիւ տէր Պետրոս արք. Միրիաթեանին, արհիապատիւ Յովհաննէս Թէյրուզեանի եւ Պօղոս Գուսան եպիսկոպոսներուն, ապա անոնք մասնակցեցան նաեւ նոր պատրիարքին ի պատիւ պաշտօնական ընթրիքին, որ յաջորդեց հանդիսութեան։

Նորընտիր պատրիարք Ալ Րայի իր գահակալութեան պատգամին մէջ նախ անդրադարձաւ Աւետման միացեալ քրիստոնեայ-իսլամ տօնին նշանակութեան մասին, շեշտելով որ այս նախաձեռնութիւնը կը հաստատէ թէ Լիբանան սիրոյ եւ ընկերութեան հայրենիք է։ Ան նոյնպէս նշեց «Սէր եւ հաղորդութիւն» բնաբանի կարեւորութիւնը իր քահանայական եւ եպիսկոպոսական կեանքին ընթացքին, հաստատելով նաեւ որ անիկա իր նոր առաքելութեան բնաբանը պիտի մնայ։ Ապա ան յայտնեց իր առաքելութեան ծրագրին մասին թէ ան պիտի շարունակէ իր նախորդներուն ծրագիրը, որոնք հաստատեցին եւ ամրապնդեցին Եկեղեցին այս լիբանանեան հողին վրայ։ Այնուհետեւ Ալ Րայի պատրիարքը խօսեցաւ երիտասարդներու, ընտանիքի եւ նորանոր կոչումներու հրամայականներուն մասին։ Ան նշեց ընկերային հաղորդամիջոցներու աշխոյժ ներկայութիւնը Եկեղեցւոյ մէջ։ Իր խօսքը աւարտեց յայտնելով, որ իր հոգեւոր եւ հովուապետական առաքելութիւնը կը սկսի բոլորին աջակցութեամբ եւ Աստուածամօր օրհնութեամբ։ 

Պատրիարք Ալ Րայիին խօսքէն ետք, առաքելական նուիրակ Կապրիէլ Քաչա փոխանցեց Բենեդիկտոս ԺԶ. սրբազան քահանայապետին ամբողջական հաղորդութեան նամակը եւ տուաւ նորընտիր պատրիարքին: Այսպէս նոր պատրաիրքը դարձեալ շարունակեց այն ինչ որ արդէն սովորութիւն դարձած էր մարոնիթ եկեղեցւոյ համար, այսինքն ամբողջական հաղորդութեան մէջ ըլլալ սուրբ Պետրոսի յաջորդին հետ:

Հանդիսութեան աւարտին, Լիբանանի կաթողիկէ մամուլի կեդրոնի տնօրէն տէր Ապտօ քահանայ Պու Քասմ ներկայացուց Ալ Րայի պատրիարքին կենսագրականը եւ հովուական առաքելութիւնները եւ պաշտօնները իր քահանայական եւ եպիսկոպոսական շրջաններուն։

 


Առօրեայ Աւետարանը
Այբ Էջ | Բովանդակութիւն | Հասցէարան | Օգտակար Կապեր | Նամականի
Ներքին Պրպտում՝  Armenian Keyboard
Կարդացէ՛ք այս էջը հետեւեալ լեզուներով.-    
Վերարտադրութեան ամէն իրաւունք վերապահուած է Հայ Կաթողիկէ Եկեղեցւոյ